ڈائری دا پنا 39

ڈائری دا پنا : 39

بُگھار توں مِٹھی دے رستے وچ خلیل کنبھار پہلی پھیریں اپنڑے بارے الوایا ' اوندا پیو فقیر مقیم کنبھار مٹھی تھرپارکر دا مہاندرا ہک جنڑا ہا جیڑھا لوکیں وچ اپنڑی سماجی سیاسی اہرکاری پاروں ڈِھگ آدر رکھدا ہا ' اوندیاں گالہیں وچ تھر , ننگرپارکر, راجھستان تے کَچھ دی روز ڈہاڑی حکمت بُلیندی ہئی ' اوندے نال لوک ساری رات جاگدے ہَن تے سارا ڈینہ ٹُردے ہَن ' اوہ ہزاراں لکھاں دے مجمعے وچ بولے ہا تاں لوک اکھ نہ جھمکیندے ہَن ' میں اج وی بابا مقیم کنبھار کوں وڈیوز وچ الویندا ڈیدھاں تے حیرت دے گھر وچ لگا وینداں ' گزرل ڈینہاں سوشل میڈیا تے ہک ویڈیو وچ بابے مقیم کنبھار کوں بلیندا ڈٹھا تے خلیل کوں ملتانوں فون کیتا جو بابا اج ہوندا تاں تیڈی جاہ تے یاری ساڈی اوندے نال ہووے ہا ' خلیل اگوں قہقہہ لایا " بلکل سچ اے بھائی " خلیل کنبھار مٹھی توں 30 کلومیٹر اُتر دی ہک وستی نوہٹو دا جَم اے ' اج ایہ ترے چار سو گھراں دی وستی ہے ' آکھیا ویندے کڈاہیں نوہٹو دریا ہاکڑا دی کندھی تے موہنجودڑو تے قدیم راجھستانی شہر ڈھولا ویرا دے وچکار وڈا ہک شہر ہا ' ایہ ہاکڑا دی پَھلی اج وی مینہ وسے تاں واہندی تے بدین توں اگاں شکور جھیل وچ ونج ڈھاندی اے ' ایں شہر بارے تھر دی روایت آہدی " نوہٹو وچ نو سو دھوبیاں دے گھاٹ ہِن ' کئی میل پروں نوہٹو دے عطر دی مہکار آندی کَچھ بَھج دا اڈھو کیھر جڈاں ہوتھل پری کوں پرنیجیا تاں اپنڑے شہر وچوں لڈ کے نوہٹو وچ آ وسیا ' اِتھاں اوندا پری وچوں پُتر جمیا جکھرو جیندی سخاوت تے دلیری پاروں شاہ لطیف آکھیا بس جکھرو لائق عزت دے ہے باقی اینویں ناں دے میر ہِن, ایہ مٹی بس اتنی ہئی جو جکھرو بنڑیا " ایں نوہٹو وچ ہک ما خلیل کنبھار جَنڑیا۔ رفعت عباس