ڈائری دا پنا 38
ڈائری دا پنا : 38
مِٹھی 14 کلومیٹر ' بُگھار توں روانہ تھئے ' پچھوں سڑک چھاچھڑو تے تھر ائیر پورٹ دوں پئی ویندی ہئی ' شوکت ہنگورجو کئی ڈینہواراں پِچھوں بُگھار جو آیا تاں گھر اپنڑے ٹِک پیا ' ایں ویلے سندھڑی دا عجب ہک شاعر خلیل کنبھار گاڈی پیا چلیندا ہا ' ایں جنڑے دی شاعری وچ ایں دھرتی دا اتہاس مور وانگوں کوکدا ہا ' ایہ شاعر سندھ دی اساطیر کوں نواں پیا کریندا ہا ' ایندے بارے علی آکاش لکھیا ہا جو خلیل کنبھار سندھ دی اساطیر وچ نویں سورمے تے سورمیاں دا ودھارا کیتے ' چار ڈینہ پہلے سکھر وچ خلیل کنبھار دے پہلے شعری مجموعے " بَھگے ہڈ جئیں ڈُکھاں آیوں " دی مہورت ہئی ' خلیل میکوں مٹھی توں ایں کتاب تے گالھ مہاڑ سانگے سڈیا ہا ' کتاب میکوں مل گئی ہئی تے نال سندھ دے کمال شاعر علی آکاش دے کیتے ہوئے اوندیاں نظماں دے اردو ترجمے میں پڑھ چُکیا ہم ' ایں تقریب وچ سندھ دے مہاندرے شاعر ادیب تے دانش ور موجود ہَن ' دوست ادل سومرو ,ایاز گُل ,اختر درگاہی ,ممتاز بخاری , قدیر انصاری دے ایں شہر وچ خیر پور توں امر اقبال, حیدر آباد توں لالا علی دوست عاجز, بھائی اسحاق سمیجو, تاج جوئیو , عبدالستار زنگیجو , مٹھی توں پیارو شوانی, شوکت ہنگورجو تے بہوں سارے نادر لوک کٹھے ہن ' ایں تقریب دی صدارت سانگے ملتان توں آئے ہک سرائیکی شاعر کوں آدر ڈیونڑ کہیں ہزاریں ورہیں دے سانگیاں دی نویں ہک ڈکھالی ہئی ' ایہ گالہیں میں سکھر دی ڈائری وچ پہلے وی لکھ چُکیاں ' آکھنڑا ہا جو سکھر توں اساں کٹھے ہاسے تے ایں ویلے بُگھار توں مِٹھی دا پندھ ہا۔ رفعت عباس۔