ڈائری دا پنا 36

ڈائری دا پنا : 36

بگھار وچ ترے پئے وجدے ہَن ' مندراں نال مسیتاں ہَن ' ساریاں ہکے پتھر دیاں بنڑیاں ہویاں ' ایہ بُگھار دا اپنڑا پتھر ہا ' وستی دے لاہندے پاسوں ہک ڈاہر جیندے وچ لوک ہَن پٹائی پئے کریندے ہَن 'کہیں کہیں جاہ تریمتیں ہَن ہَتھ پیاں ونڈیندیاں ہَن 'ایہ سبھ بگھار دے ایں ڈاہر وچوں اوہ پتھر پئے کڈھیندے ہَن جیڑھا پورے تھر وچ بیا کتھاہیں وی موجود نہ ہا ' ڈاہر وچ مٹی کوں کھٹیندیاں ایہ پتھر نکلدا ہا ' کوئی کوئی پتھر نوں ڈاہ فٹ لمبا ' چھی ست فٹ چوڑا تے چھی توں اٹھ انچ تئیں موٹائی وچ ہا ' وڈے پتھر ملنڑ تے شور ہک مچدا ہا ' لوک اپنڑے اپنڑے پتھر کٹھے پئے کریندے ہَن ' انہاں پتھراں کوں برابر اوہ کَٹ تے گھراں مکاناں مندراں مسیتاں کھوہیاں کیتے اپنڑی مرضی موجب پئے ڈھویندے ہَن ' ایہ بگھار دی مٹی دا دان ہا ' جیڑھا سبھ کیتے سانجھا ہا ' اِتھاں حالیں چنگی محصول کوئے نا لگیا ہا ' اِتھاں اوں شراکت دا درشن ہا جیڑھا جگ جہان وچ پِھٹ گئے ' بھیلاں دے مندر ' مسلماناں دیاں مسیتاں کندھاں گھر اوطاق سارے اِنہاں پتھراں دے بنڑے ہوئے ' شوکت دے گھر دے پنج کمرے تے پرانڑا اوطاق ایں پتھر دا ہا ' بگھار دا پتھر شراکت دی اوہ لوح ہا جیندے تے اج وی نواں سماجی معاہدہ لکھیا ونج سگدا ہا ' میں واپس پجیا تے روٹی میز تے لگ چکی ہئی ' دوست تانگھ اچ ہَن۔ رفعت عباس