ڈائری دا پنا 35

ڈائری دا پنا : 35

بُگھار دے چفیروں موراں دے ٹھکانڑے ہَن ' دھمی نال مور گلیاں ویڑھیاں چھتاں تے ان لاہندے ہَن ' ایں چار سو جھگیاں دی وستی وچ اُنہاں کیتے دانڑا پانڑی دریہ ہا ' بگھار باہرو ہرناں دی ڈس ہئی ' تتر ہی تتر ہَن ' روہیڑیاں دے ونڑاں تے رتے پُھل نہ ماندے ہَن ' جالیں تے پیلھوں ہَن ' شوکت ہنگورجو دے ڈاڈے دے پڑ ڈاڈے ایہ وستی آباد کیتی ' بھیلاں دے ترے سو گھر ہَن ترے مندر ہَن جتھاں اوہ اپنڑی ماتا دیوی کوں پُجیندے ہن ' بھیلاں دے ہر گھر وچ ماتا دیوی دی مورتی ہئی ' ما دی مورتی ' بھیل بے گھر تھئے ' روز روز دیاں دھاڑاں اگوں رُل گئے ' شودر بنڑے ' اچھوت بنڑیے ' دلت سڈویجے ' شیڈول کاسٹ دی ملامت چاتی ' پر ما کوں نال نال گِھن ٹریے ' بِھیلاں ما نہ وساری ' ما کوں رنگلے ویس کرائے ' ما کوں چنیاں چولیاں پوائیاں ' ما دے بھجن بنڑائے ' گھر دی سبھ توں سوہنڑی جاہ تے ما کوں بِلہایا ' ما دے نانویں ڈیوے بالے ' ما دے نانویں میلے ٹَھہائے ' بِھیلاں دی ماتا جیندی رہوے 'ایہ میڈی وی ماتا ہئی ' ما کہیں دی ہووے سانجھی ہوندی ' ایہ دھرتی ماتا ہئی ' اساں کتھاہیں ونجا چھوڑی بِھیلاں سانبھ گھدی ' خلیل کنبھار ڈرائیونگ دے تھکیڑے وچوں ذرا کَھن سم گیا ہا ' شوکت روٹی مانی دے اہر وچ ہا ' میں ایں وستی دیاں گلیاں وچ پیا لنگھدا ہَم۔ رفعت عباس