ڈائری دا پنا 23

ڈائری دا پنا : 23

ڈیو جی دا گھر ' کاسبو دے ہک ماہنڑو دا گھر جیڑھا کارونجھر دیاں بارشاں تے کَچھ دے لُونڑ نال بنڑیا ہا ' ایں موریں دے آبائی وطن دا واسی ' اساں ہک لکھ چَھتریہ ہزار وار پہلے ڈیو جی کوں ملیے ہاسے ' ایں کَچھ اندر یا آر پار کتھاہیں ' پہلیاں پہلیاں بارشاں توں پہلے یا بعد کڈاہیں ' ڈیو جی سامنڑے ہا ' خلیل کنبھار مُرکیا " ہاں بھئی ڈیو جی ہم آ گئے ہیں " ڈیو جی دی مسکان بھوج دے قدیمی بزاراں دے شیشے وچوں بکھی ' کَچھ وچوں لنگھدے میگھواڑاں دے پندھ وچوں چمکی ' اساں کَچھ دے موسمیں وچوں ہک لکھ چھتریہ ہزار وار ملیے ہاسے ' ایں دھرتی دا وارث ٹیکم میگھواڑ دا پُتر ڈیو جی, اساں ایں وار ملیے تاں , گورنمنٹ پرائمری سکول سادورس وچ پڑھیندا ہا ' روز اپنڑے موٹر سائیکل تے کاسبو تو سادورس تئیں 50 کلو میٹر دا پندھ کریندا ہا ' اج اپنڑے گھر اگوں خلیل کنبھار دے آدر وچ ملتانوں آئے ہک ماہنڑو کوں پچھلے کہیں ویلے وچوں چیتے پیا کریندا ہا۔ رفعت عباس