ڈائری دا پنا ۳۳

ڈائری دا پنا : 33

اسلام کوٹ ' نِمیں دا شہر اسلام کوٹ ' ننگر پارکر ویندیاں اساں شہر دے باہروں باہروں نکل گئے ہاسے ' بائ پاس چوک دے ہک پٹرول پمپ تے جِتھاں ساکوں تھرپارکر دا شاعر امام علی جانجھی اپنڑے ہک دوست نال ملیا ہا,رکیے ہاسے ' ایں ویلے اساں شہر دے اندر ہاسے ' شہر وچ تپش ہئی پر لوکیں دا ہجوم ہا 'ہک سڑک جیندے ڈوہیں پاسے نِماں دے درخت ہَن ' ہر دکان اگوں نِم دا درخت ہا ' ہوٹل اگوں نِم ' مٹھائی دی دکان اگوں نِم ' واہ! مٹھائی دی دکان اگوں نِم دا درخت ہا ' نِم دا درخت جیڑھا ویڑھیاں, گلیاں, رہواں کوں پراسرار بنڑا ڈیندے ' ایں درخت کوں ڈیکھ تے اینویں لگدے جینویں اِتھاں کوئی بہوں وڈا بھیت ہِے ہُنڑے کُھلسی یا جینکوں اساں ملنڑا ہا اِتھاہیں رہندے ہنڑے نظرسی ' جڈاں جو بیری دے درخت کوں ڈیکھ تے لگدے اتھاں بھیت کوئی ضرور ہے پر کڈاہیں نہ کُھلسی, اِتھاں کوئی رہندا ضرور ہے پر کڈاہیں نہ مِلسی, جڈاں جو پِپل تے ٹالھی بہوں وڈا وعدہ ہِن ' ملاپ دا ترسلا تے درشن دا ' خلیل گاڈی وچ بیٹھا ریہا ' ایندا مطلب ہئی بھائی جلدی جلدی شہر کوں مِل گھنو ' شوکت ہنگورجو تے میں گاڈی وچوں لتھے ' شوکت ہک جنرل سٹور وچ وڑ گیا ' اوں پانڑی دیاں بوتلاں تے چِپس گھدے تے پَھلیں دی ریڑھی اگوں رُک گیاں ' اوں کیلے تے کِنو گِھدے 'میں سڑک تے ہکے پیریں اگاں تے پِچھاں دور تئیں لگا گیا ' اسلام کوٹ شہر دیاں ساریاں گلیاں اندر بزار دے سجے کھبے پاسوں ہکے ویلے پَیہ گیا ' سارے لوکیں کوں ڈٹھم بوہیاں اگوں کھڑیم ' ایہ اوہ اٹکل ہئی جیڑھی میں ایں حیاتی دی تِکھائی وچ بہوں دھیرج نال ڈھارس نال ہک ہک شے کوں ڈیکھنڑ کانڑ سِکھی ہے ' ایہا اوہ ڈَس ہئی جیڑھی میکوں ایں شہر دے کُلم درشن تئیں گھن گئی ' میکوں کہیں شہر وچ ڈو گھڑی پیر دھرنڑ دی جاہ ملے میں یاترا پوری کر گِھنداں ' اسلام کوٹ دے گشٹالٹ وچ اساں پورے 30 مِنٹاں دے زمانِ مطلق وچ رُکیے ریہیے :

ایڈی سوہنڑی دنیا دے وچ جلدی نہ کر دِلڑی

ہولے ہولے ڈیکھنڑ ڈے توں ہک ہک شے اساکوں

(رفعت عباس)