ڈائری دا پنا ۳۰
ڈائری دا پنا : 30
ڈیو جی دا گھر ' ہک درمیانہ کمرہ جیندے وچ ترے کھٹوں تے رلیاں وِچھیاں ' کھٹوں دے وچکار ترے میزاں تے چٹیاں چادراں ' میزاں تے پلاسٹک دے ڈھاکویں ' نرہانڑ دا ویلا ہا ' ڈیو جی دے گھر وچ نرہانڑ دا ویلا ہا ' پچھلا بوہا ہک نکے جہے ویڑھے وچ پیا کُھلدا ہا ' ہک کوٹھے تے موریں دا جوڑا ہک بیٹھا ہا ' ایں بہوں وڈی کائنات وچ کاسبو دے میگھواڑیں دے گھر نرہانڑ دا ویلا ہا ' کارونجھر تے رِنڑ آف کچھ دے وچکار ہک کمرے وچ خلیل کنبھار شوکت ہنگورجو تے ملتانوں آئے ہک شاعر دے آدر وچ مقامی میگھواڑیں دے مُکھ تے مسکان ہئی ' ڈیو جی دے پتا ٹیکم جی چاچا بھانو تے جالم سوتر امولکھ ایں دھرتی دے حقیقی پُتر اپنڑے مہمانیں کوں ڈیکھ ڈیکھ پئے ٹھردے ہَن ' ڈھاکویں کھلے تاں نرہانڑ دا جہان ہک کُھل گیا ' بھنڈی سنگری دیاں پَھلیاں بیسنی آلو تلے ہوئے چِبڑ مکھنڑ ماکھی کنڑک دی روٹی جو دے ڈھوڈھے ' کاسبو دیاں گائیں دی لسی ' اساں اپنڑی حیاتی وچ 19 اپریل 2018 کوں ڈاہ وجے دھمی کاسبو دے میگھواڑیں دے گھر نرہانڑ کیتی۔ رفعت عباس