چھٻیاں تے پکھے
وستی ءِچ عورتاں چھٻیاں ، کنجیراں تے پڑچھے وی بݨیندیاں ہن ۔ سارا کم خجی دے بھوتریں دا تھیندا ہا ۔ نانی عالموں قصائیݨ ایں کم دی اُستاد ہئی ، بھوتریں دی رنگائی سوہݨی کریندی ہئی ۔ خجی دے پاندکپ تے بھوترے انج کریندے ہن ، بھوتریں کوں سُکا تے صاف کیتا ویندا ہا ، ولا بھوترے ساوے رتے گاڑھے تے پیلے رنگ ءِچ رنگیندے ہن ۔ ݙاݙی ݙسیندی ہئی جو اماں تیݙی چھٻیاں کنجیراں تے سُندھڑے وی بݨیندی ہئی ، ہتھ آلے پکھے سادہ وی بݨدے ہن تے ڈیزائن آلے وی ۔ چھٻیں دے نال نال چھٻے ، ٹوکرے تے ٹوکریاں وی بݨایاں ویندیاں ہن ۔ کئی عورت واندی نہ ٻہندی ہئی ۔ عورتاں کپڑے دے کم وی کریندیاں ہن تے گندیاں گندولے وی سیندیاں ہن۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان