چوݨ

ایوب خان دا دور یاد اے ،ایوب خان دے خلاف جلوس نکلدے ہَن ،بھٹو صاحب دے وݙے وݙے جلسے تھیندے ہَن ،بھٹو دے جلسے ءِچ کݙاہیں  ونڄ تاں  نہ سڳیے اخباریں  ء ِ چ پڑھدے ہاسے ۔ مساوات اخبار ءِچ وݙیاں  وݙیاں  خبراں  اَمدیاں  ہَن ۔ مشرقی پاکستان دیاں  خبراں  چھپدیاں  تاں  ہَن پر گھٹ ۔ ٻہہ تے ڳالھیں  کریندے ہَن جوجیویں اِتھاں بھٹو دی گݙی چڑھی پی ءِمشرقی پاکستان ءِچ شیخ مجیب دا ناں  چڑھیا پے۔لوکیں  کُتا کُتا کیتا تاں  ایوب کرسی چھوڑ ڳیا ۔ اقتدار یحییٰ خان کوں  ݙے ڳیا ، یحییٰ خان الیکشن دا ہوکا ݙتا اسیݙی وستی ءِچ ݙاڈھی اَل بھل ہئی ، لوک اینویں  جذباتی ہَن جیویں  آپ امیدوار ہوون۔ سارے بھٹو دے حامی ہَن ،قومی اسمبلی دا امیدوار میجر عبدالنبی کانجو ہا ، میجر صاحب سرائیکی اڳواݨ عبدالمجید کانجو دا پیئو ہا ،ہا تاں  پیپلز پارٹی دا پر بہاول پور صوبے دی ڳالھ کریندا ہا ۔ ہک واری اسیݙی وستی آیا ہا ،اسیݙے کھوکھے آلے پھٹے تے آ ٻیٹھا ہا ،اوں  ڳالھ چلائی جو بہاول پور صوبے آلے وی اَئے ودن ، اساں  وی بہاول پور آلے ہیسے ، باقی میں  تہاکوں  کیا آکھاں  ، ووٹ تاں  سارا بھٹو دا ہے ۔ بھٹو دے حامی بھٹو زندہ باد دے نعرے لائے او الیکشن جیت ڳیا ہا، صوبائی امیدوار میاں  نور الرحمن نہ جیت سڳیا کیونجو ڈھیر سارے ووٹ سیٹھ اختر گھن ڳیا ہا ، او وی جتھاں  ویندا ہا وسیب دی ڳالھ کریندا ہا ، بہاول پور صوبے دا وی آکھدا ہا تے اے وی آکھدا ہا جو میں  تہاکوں  پرائمری سکول وی بݨوا ݙیساں  ۔ تریجھا امیدوار چوہدری کلیم اللہ آزاد امیدوار ہا ۔او وی بہاول پور صوبے دا جھنڈا چئی ودا ہوندا ہا ۔جیت ڳیا تے وَل نہ اوں  کݙاہیں  صوبے دی ڳالھ کیتی تے نہ وسیب دی ۔حکمران جماعت نال رَل ڳیا ہا ،معین آباد سٹیٹ دا منیجر ہا ، اپݨے وی ڈھیر سارے رقبے بݨا ڳیا ہا ۔اپݨے رقبے بچیندا بچیندا 1973ء دے سیلاب وچ خان پور کوں  غرق کرایا ہَس تے ولا اوندی اپݨی وی ہمیشہ کیتے سیاست غرق تھی ڳی۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان