چوڑا انا ݙے جیسلمیر دا
شاعر: حضرت خواجہ غلام فریدؒ
کافی نمبر:6
مصرعے:14
الفاظ:66
راگ:جوگ
کافی
[لکھو | ماخذ وچ تبدیلی کرو]چُوڑا اَنا ݙے جیسلمیر دا
سُوہا، رَنگا ݙے خاص اجمیر دا
ہووے اصلی خاص مَڑیچہ
نہ نقلی وَل پھیر دا
جلدی آوے نہ چِر لاوے
کم نہیں اِتھ دیر دا
بِرہُوں دا چُوڑا پِرِیت دا سُوہا
کَاک ندی دے گھیر دا
بَچھوا بِیکانیری گھنساں
سَڄڑے کَھٻڑے پیر دا
سَہجُوں پیساں پا ٹَھمکیساں
تھورا چیساں ڈیر دا
یار فرید ؔ مَنِیندِم آکھیے
کیا غم ٻئے دے ویر دا
اَوکھے لفظاں دے معانی
[لکھو | ماخذ وچ تبدیلی کرو]•چوڑا:چوڑیاں دا دستہ،جیسلمیر وچ ہاتھی دے ݙند دا چوڑا بݨایا ویندا ہا۔جیہڑا ٻہوں نفیس تے قیمتی ہوندا ہا
•سوہا:بوچھݨ زیادہ تر ساوا یا رتا
•انا ݙے: منگوا ݙے
•مڑیچہ: مارواڑ(ہک ہندوستانی علاقہ) دا
•چِر: دیر،تاخیر
•برہوں:عشق
•پریت: محبت
•کاک ندی: محبت دی ندی
•بچھوا:پیراں دیاں انگلیاں تے پیراں دا زیور
•تھورا: احسان
منیندم آکھیے: میݙا آکھݨ منیندے
اوکھے لفظاں دے تلفظ
[لکھو | ماخذ وچ تبدیلی کرو]•ٹھمکیساں: ٹھم کے ساں
•پیساں:پے ساں
•منیندم:منے ں دِم
ذو معنی الفاظ
[لکھو | ماخذ وچ تبدیلی کرو]•انا:منگوا ݙے/خودپسندی/خودی/انا الحق
•دا: دا/داؤ
•چر:دیر/چیرݨ دے حوالے نال چر
مختصر وضاحت
[لکھو | ماخذ وچ تبدیلی کرو]•چُوڑا اَنا ݙے جیسلمیر دا
سُوہا، رَنگا ݙے خاص اجمیر دا
وضاحت: اِیں شعر وِچ خواجہ سئیں چوڑے اَتے سوہے دا ذکر کریندن آپ اَپݨے دِل دی سِک بیان کریندے ہوئے فرمیندن جو میکوں جَیسلمیر دا چوڑا منگوا ݙیوو اَتے خاص اَجمیر تُوں بوچھݨ رَنگوا ݙیوو۔ ماہرین دے مُطابق، آپ اِتھاں اَجمیر نال اَپݨی عقیدت دا اِظہار وی کریندن۔
•ہووے اصلی خاص مَڑیچہ
نہ نقلی وَل پھیر دا
وضاحت: اِیں شعر وِچ آپ فرمیندن جو چوڑا تے سوہا ݙوہَیں دوکھے بازی آلے نہیں ہووݨے چاہیدے، بلکہ بالکل اَصلی اَتے خاص مارواڑ(ہک ہندوستانی علاقہ)دے علاقے دے ہووݨے چاہیدن۔
•جلدی آوے نہ چِر لاوے
کم نہیں اِتھ دیر دا
وضاحت:اِیں شعر وِچ آپ فرمیندن جو ایہ کَم جلدی تُوں جلدی تھیوݨا چاہیدا ہے، اِیندے وِچ کوئی وی دیر نہیں تھیوݨی چاہیدی، اِتھاں دیر دا کوئی کم کائنی۔
•بِرہُوں دا چُوڑا پِرِیت دا سُوہا
کَاک ندی دے گھیر دا
وضاحت:اِیں شعر وِچ آپ فرمیندن جو چوڑا اَتے سوہا ݙُوہیں پیار اَتے مُحبت آلے ہوݨے چاہیدن اَتے کَاک ندی دی دے گِھیر دے یعنی پیار مُحبت دے دائرے وِچ گِھرے ہوئے ہووݨے چاہیدن۔
•بَچھوا بِیکانیری گھنساں
سَڄڑے کَھٻڑے پیر دا
وضاحت:اِیں شعر وِچ آپ بچھوے دا ذکر کریندن۔ آپ فرمیندن جو میں بیکانیر (جیہڑا ہِک ہندوستانی علاقہ ہے) دا بچھوا گھِنساں سڄے تے کھٻے ݙوہیں پَیراں دا۔
•سَہجُوں پیساں پا ٹَھمکیساں
تھورا چیساں ڈیر دا
وضاحت:اِیں شعر وِچ آپ فرمیندن جو میں خوشی نال ایہ شیئاں پَیساں اَتے پا ٹھمکیسان۔ بھاویں میکوں اِیندے کیتے ݙیر (جِیہڑا گھن تے ڈیسی) دا احسان چاوݨا پووے۔
•یار فرید ؔ مَنِیندِم آکھیے
کیا غم ٻئے دے ویر دا
وضاحت:اِیں شعر وِچ آپ فرمیندن جو یار میݙی ڳالھ منیندے تاں ٻئے دی مُخالفت یا دُشمنی دا کیا غم ہے۔
نتارا
[لکھو | ماخذ وچ تبدیلی کرو]اِیں کافی وِچ حضرت خواجہ غلام فرید ؒ ݙو لگظ اَپݨی اِصطلاح وِچ بیان فرمیندے ہِن۔ ہِک لفظ چوڑا اَتے ݙوجھا سوہا۔ چوڑا تِریمتیں اپݨیاں ہتھاں وِچ زیب و زینت کیتے پیندیاں ہِن اَتے سوہا رنگین بوچھݨ ہوندے جِیہڑا جو اَجمیر شریف دا ٻہوں مشہور ہِے۔ اِیں کافی وِچ چولستانی ثقافت اَتے اُنہاں دی رُوحانی عقیدت، جیندا اُنہاں خاص طور تے اَجمیر شریف نال اظہار کیتے، روہی دے زیورات دے پردے وِچ واضح کیتا ہے۔
ٻیا ݙیکھو
[لکھو | ماخذ وچ تبدیلی کرو]•اساݙے ایں کم دے بارے وچ ڄاݨݨ سانگے ایہ مضمون ݙیکھو: