چنانہہ دریا

دریائے چنانہہ یا چنھاں یا چناب دا ناں 'چن' تے 'آب' توں مل کے بݨدے جس وچ چن دا مطلب چندر تے آب دا مطلب پاݨی ہے، (چندر بھاڳ، دریائے چناب دا پراݨا ناں ہے۔) دریائے چندرا تے دریائے بھاڳا دے بالائی ہمالیہ وچ ٹنڈی دے مقام تے ملاپ نال بݨدے، جیہڑا بھارت دی ریاست ہماچل پردیش دے ضلع لاہول وچ واقع ہے۔ بالائی علاقیاں وچ اینکوں چندرابھاڳا دے ناں نال وی پکارا ویندے۔ ایہ جموں و کشمیر دے جموں دے علاقہ توں وہندا ہویا پنجاب دے میداناں وچ داخل تھیندے۔ پاکستان دے ضلع جھنگ وچ تریموں بیراج دے مقام تے ایہ دریائے جہلم نال ملدے تے ول دریائے راوی کوں ملیندا ہویا اوچ شریف دے مقام تے دریائے ستلج نال مل کے پنجند بݨیندے، جیہڑا کوٹ مٹھن دے مقام تے دریائے سندھ وچ ونڄ ڈہندے ۔ دریائے چناب دی کل لمبائی 960 کلو میٹر ہے تے سندھ طاس معاہدے دی رو نال ایندے پاݨی تے پاکستان دا حق تسلیم ہے۔ ویدک زمانہ (قدیم ہندوستان) وچ اینکوں اشکنی یا اسکمتی دے ناں نال تے قدیم یونان وچ آچے سائنز دے ناں نال ڄاݨا ویندا ہئی۔ 325 قبل مسیح وچ سکندر اعظم نے سکندریہ (جیہڑا اڄ شاید اوچ شریف یا مٹھن کوٹ یا چچارن ہے) ناں دا ہک شہر دریائے سندھ دے نزدیک پنجند دے سنگم تے تعمیر کیتا۔ پنجابی تے سرائیکی تہذیب وچ چناب دا مقام ہک علامت دے طور تے ہے جس دے گرد پنجابی تے سرائیکی سوجھ ٻوجھ گھمدی ہے تے ہیر رانجھا دی سرائیکی رومانوی داستان دریائے چناب دے گرد ہی گھمدی ہے۔ ہندوستان ریلوے، جموں و کشمیر وچ دریائے چناب تے دنیا دا سب توں اچا پل بݨیندی پئی ہے ۔