چل میݙے گھوڑے ٹُردا ڄل

9:15تے سارے یاتری سوار تھی ڳے اَتے بس امیگریشن دفتر توں ٻاہر نکل کے امبرسر کن ٹُر پئی ۔ ساݙی بس دے ہک یاتری کول ݙو کلو خسخاس ہئی ۔ پتہ لڳا جو ہندوستان وچ خسخاس دی مانگ ہے اَتے اوہ یاتری ایں لئوں اُتھّاں گھدّی ویندے۔ سمان دی پڑتال ویلے عملے خسخاس ݙٹھی ہئی اَتے یاتری کوں گھن ونڄݨ دی موکل ݙتی ہئی۔ میں ہک ٻئے یاتری دے سمان وچ ’’پان مسالے‘‘ دے ݙٻے ݙٹھے۔ ظہور دھریجہ اپݨے نال فریدی رومال‘ سوہن حلوہ ‘ کتاباں وغیرہ گھدّی ویندے ہَن ۔ پنج منٹ بعد اَٹاری آ ڳیا ۔ ایہ ہک نِکڑا جیہاں قصبہ ہے ۔ سرحد پار لنگھدیں اِی ساکوں مسلماناں دی جاء سکھ نظر آوݨ لڳ ڳے ۔ باقی سارا لینڈ سکیپ پاکستان سنّواں ہا۔ بھوئیں ‘ ماحول ‘ رڑھ رنگڑی ‘ فانا فلورا سارے ہک سنّویں ہَن ۔ صرف مذہب دا فرق ہا ۔ ہندوستانی پنجاب دا کلچر وی پاکستانی پنجاب سنّواں ہے ۔ میں ٹکٹ کن ݙٹھا تاں پتہ لڳا جو واہگہ توں دِلّی 570ک ۔م ہے ۔ خالی سفر دا ویلا اَٹھ گھنٹے ہے ۔1:30گھنٹہ رستے وچ نرھان ۔ لنچ تے چاہ کیتے اَنج ہے۔ کل 9:30گھنٹے سفر دے بݨدے ہَن ۔ اینویں اِی تھیا -اَساں 9:15سویل کوں واہگہ پار کیتا ہا اَتے شام 6:40تے دِلّی ڈاکٹر امیڈکر ٹرمینل دہلی گیٹ تے لتھّے کھڑے ہاسے۔ ایں لحاظ نال بس دی رفتار 70ک ۔م فی گھنٹہ بݨدی ہئی۔

دوستی بس دے اڳوں پِچھوں سکیورٹی ہئی۔ ہر جیپ وچ ترے؍ چار گارڈ موجود ہَن ۔ ڈرائیور علاوہ ہا ۔ جیپ اُتّے ݙو لال جھنڈے جھوجھدے پئے ہَن ۔ واہگہ توں پار آئیوسے تاں مین روڈ کوں وَدھیندے پئے ہَن ۔ ہک پاسا چالو ہا ݙوجھے پاسے تعمیراتی کم جاری ہا ۔ پنج ست میل بعد سڑک ݙو طرفہ تھی ڳئی ۔2004ء اِچ اَئے ہاسے تاں سڑک سنگل ہئی ۔ ایہ ٹولین روڈ ہئی ہُݨ فورلین بݨ ویسی ۔ پوادھی پنجاب ٻہوں ساوا ‘ زرخیز تے اعلا علاقہ ہے ۔ بھوئیں دی گھاٹی ساول من کوں بھاندی پئی ہئی۔ ساݙے سب دے موبائل جام تھی چُکے ہَن ۔ ظہور دھریجہ دے نال ہندوستان دا ہک سنگتی ٻیٹھا ہا ۔ اوندے موبائل دے ہتھڑیکے ظہور دھریجہ ڈاکٹر جے۔ سی۔ بترا تے ڈاکٹر راج کمار نال رابطہ کیتا ۔ اوہ خوش تے نہال تھی ڳے ۔ اُنہاں ہندوستان دی سر زمین اُتے داخل تھیوݨ اُتّے ساݙا سواگت کیتا۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان