چشتی مہرابی
ج: 1949ء
چشتی مہرابی دا پورا ناں نور الحسن چشتی اے۔ اِنھاں دا تعلق مہراب آلے نال اے۔ لمبے عرصے کنوں شاعری کریندن ۔ بنیادی طور تے کافی دے شاعر ہن پر اِنھاں کُجھ غزلاں وی لکھیا ہن جنھاں وچ سادگی صاف نظر آندی ہے۔
؎ نسخہ سستا نی کر سڳدیاں مردے ہوئے بیمار دیاں ڳالھیں
سچی ڳالھ سݨیندے چشتی کُوڑیاں ہن اخبار دیاں ڳالھیں
٭ چشتی مہرابی بمطابق شناختی کارڈ ، ملاقات مہراب آلا۔یکم مارچ2012ء
کلام ٭
(1)
میں اپݨیاں اُمیداں دا سفر پاک رکھینداں
بھانویں ہے جگر زخمی جگر پاک رکھینداں
راہ تیݙا اکھیں میݙیاں اے وَل وَل پیاں تکیندن
گھر میݙا ہے ناں تیݙے میں گھر پاک رکھینداں
سوچاں دے سمندر دی وی نی رات پئی مُکدی
شاعر ہاں خیالاں دی سحر پاک رکھینداں
راہاں تے عقیدت دے میں پھُل روز وِچھینداں
پَوَں پا تاں سہی دل دا نگر پاک رکھینداں
دیدار تیݙا میݙے کیتے ہے عین عبادت
ہیں سانگے تاں چشتیؔ میں نظر پاک رکھینداں
(2)
ایہ کم وی ہُݨ کرݨا پئے ڳئے
وقت توں پہلے مرݨا پئے ڳئے
زور آور ہے ڈھول اَساݙا
ہر ویلے سئیں ݙرݨا پئے ڳئے
ہک ماݨھوں دی خاطر سارے
گوٹھ دا پانی بھرݨا پئے ڳئے
مونجھ منُجھاری کھادی ویندی
ماس ہݙاں دا چرݨا پئے ڳئے
ایہ نگری ہے پیار دی چشتیؔ
ادب نال گذرݨا پئے ڳئے
(3)
من موہن من ٹھار دیاں ڳالھیں
یاد آندیاں ہن پیار دیاں ڳالھیں
وقت دی کالی رات وِچالے
سوجھلا ہِن سرکار دیاں ڳالھیں
سِروں ننگیاں دی وستی اچ
کون کرے دستار دیاں ڳالھیں
ماکھی توں وی مِٹھیاں لڳدن
سانول تے غم خوار دیاں ڳالھیں
دُھپ دے مار ئیے لوک کریندن
اکثر چیتر بہار دیاں ڳالھیں
نسخہ سستا نی کر سڳدیاں
مردے ہوئے بیمار دیاں ڳالھیں
سچی ڳالھ سُݨیندے چشتیؔ
کُوڑیاں ہن اخبار دیاں ڳالھیں
حوالہ
[لکھو | ماخذ وچ تبدیلی کرو]کتاب احمد پور شرقیہ اِچ سرائیکی غزل دی ٹور، مصنف : عبدالباسط بھٹی ، ناشر : جھوک پبلشرز ، ملتان