چرخہ نامہ
چرخہ نامہ نظم دی ایجھی قسم ہے جیں وچ چرخہ تے اوندے لوازمات کوں علامت دے طور تے ورتیا ویندے ۔ چرخے کوں دیہی وسیب وچ ٻہوں اہمیت حاصل ہے۔ زالیں کیتے چرخہ کتن سگھڑاپے دی نشانی ہے ۔ شعراء چرخہ ‘ تند ‘ سُر وغیرہ کوں نیک اعمال ‘ خوش اخلاقی ‘ رزق حلال‘ انکساری ‘ عاجزی تے عبادت دیاں علامتاں بݨا تے ایں صنف وچ شاعری کیتی ہے۔ سرائیکی وچ اے چرخہ نامے سی حرفی دی صورت وچ ملدن۔ سب توں مشہور سی حرفی چرخہ نامہ ملتان دے بزرگ اولیا ء اللہ حضرت خواجہ جمال اللہ مظہر الٰہی دا ہے۔1160)ھ ۔1264ء) انھاں اے چرخہ نامہ لکھ تے نہ صرف ایں صنف کوں فنی کمال بخشے بلکہ سی حرفی وچ اپݨے اَݨ منٹ نقو ش چھوڑین۔
الف اُٹھی دھیا نت جاگ سویلے توں سُݨ دھی سیاݨی
گھن چرکھا پا کتن کھوڑی لمبی رات وہاݨی
ایہو ویلا ہتھ تیݙے ناں آسی دھی ٻلیاݨی
اُتھ جمال سُہاڳن سوہے جوشوہ دے من بھاݨی
ص صفائی نال دھیا توݨیں کت پئی ہکا چھلّی
ٹُھلّے سُتر دے کترن کنوں تند نکھیری بھلّی
ساری عمر دا کیتا ونڄایو گھت کر تند اولّی
فضل جمال اللہ دے ٻاجھوں سجھّے نہ کئی ڳلّی
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان