چاکی دا کھوہ

اسیݙی وستی دے نال چاکی دا کھوہ اے ، ایں  وستی ءِچ جمالی برادری ٻیٹھی ءِ، ادب تے ثقافت آلے لوک ءِن ، چاچا کمال دین ، چاچا جمال دین ، چاچا موسیٰ خان ، ابّے میݙے دے یار ہن ، نعتاں  پڑھدے ہن ۔ چاچا نور دین ݙاڈھا مذاقی ہا ، بندے حال پُچھیا ، نور دین خاں  ݙے حال ، کیویں  غزدی پی اے ، نور دین خاں  اَکھیندے ادا اللہ دا کرم ءِ، موجاں  موجاں  ، بہاراں  ہن ، عیش پے کریندوں  ، روٹی کپڑے دی تنگی دے سوا اللہ سئیں  کہیں  لوڑ دی تھوڑ نی ݙتی ۔ہِیں  وستی ءِچوں  ہک بزرگ اَمدا ہا ، او نظریل جتھاں  نظر مارے ہا خطا ٹھاہ تھیندی ہئی ۔ ہِیں  وستی دا چاچا امیر دین تکڑا تے لڑاکا جوان ہا ، کوݙیاں  کھیݙدا ہا تے چوری ، بدمعاشی آلے پاسے وی ناں  ہس ۔ خلق اخلاق دا چنگا ہا۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان