ڄٹ پنج نی سہندا

پاکستان بݨݨ کنوں پہلے سرائیکی وسیب اِچ رَہݨ آلے ’’کِراڑ‘‘ اِتھاہوں دے رڑھ رَہکی کرݨ والے مسلمانیں کوں ڄٹ سݙیندے ہَن ‘ڄٹ شودے سِدھے سادھے ‘ بھولے بھالے ہوندے ہَن اَتے کِراڑ ݙاڈھے چتر چلاک ‘ میسڑیں تے ہشیار ہَن ۔ ڄٹ رڑھ رَہکی کر تے جیرھا کجھ کمیندے ہَن او ونڑج وپار کرݨ آلے مُکھی فصل لہݨ تے وہاج دے ناں تے سنبھال گھندا ہا ‘ کیوں جو ڄٹ ہمیشہ اوندے قرضائیں رَہ ویندے ہَن ۔ اوہِیں کاݨ جو سرکاری نوکریں تے ونڑج وپار دے نال نال زمیندارے تے وی کِراڑیں دا قبضہ ہوندا ہا ۔ اِتھاہوں دے وݙے وݙے زمینداریں تے جاگیرداریں دے منشی مُسدی تے مودی وی کِراڑ ہوندے ہَن ۔ زمینداریں تے جاگیرداریں دی آمدݨ تے خرچے دا سارا حساب کتاب انہیں دے ہتھ اِچ ہوندا ہا تے ایہے ٻدھی چھوڑی دے ذمے وار ہوندے ہَن ہک ٻے نال ݙینھ رات دے ورتاوے پِچھوں مُکھی مارکہ مسلمانیں کوں چنڳیں رِیت سُنڄڑیندے ہَن اَتے اَکھیندے ہَن جو ڄٹ پنج نیں سہندا تے پنجاہ سَہندے۔

پنج تے پنجاہ آلی ایہ ڳالھ اخباریں اِچ ہک خبر پڑھ تے یاداَئی ہے خبر ایہ ہئی جو پاکستان ٹیلی ویژن کنوں مشہور موسیقار ’’تان سین‘‘ تے ہک قسط وار لمبا پروگرام پیش کرݨ دی تجویز ہئی ‘ پر ہُݨ ایہ پروگرام پیش کائناں تھیسے۔ بھئی ! کیوں پیش کائناں تھیسے؟ ایں واسطے جو تان سین ہندو ہا بے شک وݙا موسیقار تے قیامت تائیں ناں رکھݨ آلا فنکار ہا پر ہا تاں ہندو ‘ ناں تے ہک ہندو تے اسلامی جمہوریہ پاکستان دا ٹیلی ویژن قسط وار لمبا پروگرام پیش کرے ایہ کینویں تھی سڳدے ؟ نا سئیں نا ! ایہ نِیں تھی سڳدا ایندے نال تاں اسیݙی مسلمانی مُک ویسی۔

اسلامیہ جمہوریہ پاکستان اِچ ایہ تھی سڳدے؟ جو ہندوستان دا ہک ہندو فلم ایکٹر اسلام دے سبھ توں وݙے دعویدار صدر (آنجہانی ضیاء) دا ’’پُتریلا‘‘ بݨ سڳدے اوندے فلمیں دے کیسٹ سوکھڑی طور قبول کر تے پریذیڈنٹ ہائوس اسلام آباد اِچ اَپݨے ٻالیں ٻچیں تے مہمان پتریلے نال ٻہہ تے وی سی آر تے ݙیکھ سڳدن ‘ ہوں ویلے تاں کہیندی مسلمانی خطرے اِچ کائناں اَمدی ہئی تے نہ وقت اَڄکل دھاڑ دھاڑ ٻڑنگ گھتݨ آلے اُنہیں ݙیہاڑیں کسکدے ہَن۔

اسلام تے پاکستان دے انہیں ٹھیکیداریں دے ہوں اسلام دے سبھ توں وݙے دعویدار دے دورِ حکومت اِچ ہیروئن ‘ کلاشنکوف (جہادِ افغانستان دے تحفے) اَتے وی سی آر دی وَبا عام تھئی ۔ اسلام آباد ‘ راولپنڈی‘ کراچی ‘ کوئٹہ ‘ لاہور جیہے وݙیں شہریں کنوں لاء تے خان پور جہے چھوٹے چھوٹے شہریں دی ہرڳلی ‘ محلے اِچ ویڈیو کیسٹیں دیاں دکاناں کُھل ڳیاں جیڑھیاں ہُݨ تئیں چلدیاں پِن ‘ چھڑے لاہور شہر اِچ ویڈیو کیسٹیں دی ہک لکھ دکان اے ‘ انہیں دکانیں تے انگلش  ’’ایکس‘ڈبل ایکس‘‘ ٹرپل ایکس‘‘ انڈین تے سنسر تھیوݨ دے بغیر پاکستانی فلمیں دے ویڈیو کیسٹیں دی خریدو فروخت دا کاروبار کھلے عام ‘ ݙینھ رات ‘ تھیندا پے‘ پنجاب اِچ آئی جے آئی دی حکومت اے تے اسلام اَتے پاکستان دے وݙے ٹھیکیدار (مامیں آکھوں تاں کوڑیج ویسن) لہوراِچ ٻیٹھیں ‘ اختیارات اِی انہیں دے ہتھ اِچ ہِن ‘ اسلام آباد دے افسریں اِچ ٻیٹھے ہوئے انہیں دے ایجنٹ ‘ اپݨاں کم ݙکھائی رَکھدن تے پاکستان ٹیلی ویژن تے انہیں دی کاوڑ ایں ڳالھوں ڈھیری نیں تھیندی ‘ جو او مرکزی محکمہ ہے تے مرکز اِچ ایہو جہی جماعت دی حکومت اے جیندے نال اُنہیں کوں ازل کنوں وَیر اے ‘ جنرل ضیاء مرحوم دے اسلامی دورِ حکومت اِچ جو کجھ تھیندا رَہ ڳے اسلام خطرے وچ نیں آیا تے ہُݨ ’’(تان سین) پروگرام چلݨ نال قیامت آ ونڄے ہا ۔ کِراڑ سچ آہدے ہَن جو ’’ڄٹ پنج نی سہندا‘ پنجاہ سَہندے‘‘۔

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان