ڄٹ برادری

[ڄَٹ قوم ۔ برادری دی جنیٹکس: سبھ گول مول ہے] لکھت: مشتاق ڳاڈی

میں کُجھ مُدت کنیں زور و شور نال جنیٹکس تے خاص کر ساؤتھ ایشیا دی جنیٹکس کوں پڑھدا پیاں۔ کیوں؟ اصل وچ تاں وادی سندھ دی قدیم (ہڑپہ) تہذیب دا کورس پڑھینداں تے ایں حوالے نال ننویں جنیٹکس ریسرچ دے ڈھڳ حوالے پڑدھدا ریہم۔ وت سوچیم جو ذرا اینکوں ودھیک ڈونگھپ وچ پڑھاں۔ جیویں ہر ننویں فیلڈ وچ کئی ننواں شئیں حیرت دا موجب بݨدن، ایں پڑھائی نال وی کُجھ اینویں ای تھیندا پئے۔ مثال کیتے سوات تے پشاور وادی دے پٹھاݨیں دی ہک ننویں تفصیلی جنیٹک ریسرچ کوں پڑھ کنیں ڄاݨ تھئی جو بھائی اتھاں وسدے "اُتمان خیل" دا پٹھاݨیں نال کئی خاص جنیٹک رلیشن یا سانگا نئیں بݨدا جݙاں جو :اُتمان خیل" اپݨے آپ کوں پٹھاݨ آہدن تے جڳ مشہور پختون قوم پرست باچا خان دا اُنہیں نال تعلق بݨدے۔

اڄ انڈیا تے پاکستان وچ وسدی ڄٹ قوم ۔ برادری بارے ہک ننویں جنیٹک ریسرچ پڑھی ہے جئیں کنیں ڄاݨ تھئی ہے جو انہیں دی کئی اپݨی وکھری یا نویکلی جنیٹکس کائیں نی۔ انہیں دی جنیٹکس دا سانگا نو (9) انجو انج آباواجداد تے کہیں حد تائیں ریجنز نال بݨدے۔ ایں کیتے اے جنیٹک مکسچر دا وݙا نمونہ ہن۔ ݙو پراݨیاں تھیوریز جو اے انڈو آریائی یا سکیتھئین نسل نال سانگا رکھدن، ایندی وی کئی خاص پریتی تصدیق نئیں تھیندی۔

ودھ امکان اے ہے جو جٹ قوم یا برادری دا ہزاریں سالیں وچ جنیٹک مکسچر تھیندا ریہے تے اے سوشل یا کلچرل گروپ ودھ ہے۔ اینکوں ہک نسلی گروہ سمجھݨ غلط ہوسی