پیر رشد اللہ شاہ

آپ پیر رشید الدین دے پتر ہن۔آپ دی پیدائش پیر جھنڈو گھوٹ 1860ء وچ تھئی۔آپ عربی ‘ فارسی ‘ سندھی تے سرائیکی دے اُتے کافی عبوررکھدے ہن۔ پیر رشد اللہ شاہ عرف پیر سئیں خلافت والا راشدی سادات سݙویندے ہن۔ انہاں سرائیکی کافیاں لکھن۔ تصوف انھاں دا خاص موضوع ہے۔ حقیقت تے مجاز ݙوہیں رنگ انہاں دے شعراں وچ ملدے ہن۔ آپ اپݨے والد ماجد دے مکتب کوں مدرسہ بݨا ݙتا۔ جیندے صدر معلم مولانا عبید اللہ سندھی ہن۔ آپ دے کلام دا ہک قلمی نسخہ موجودہے۔(30)

کافی

جادو لا کے جادو یار

روح رجھایو راول یار

حسن عشق کوں اڳ وچ کرکے

دیداں دو نالیاں برسر بھر کے

دہشت ݙے کے دل کوں دڑکے

تن میݙا کر تابعیدار

دِلبر دلڑی دست کتوئی

ونگ دھرو دا گھت کتوئی

نال نیناں دے ناز نتوئی

پا کے کجل ڈھولن دھار

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان