پیارے لال
پیارے لال ڄام پوری عہد شاہ جہاں 1036)ھ ۔ 1627ء) ۔ 1068)ھ ۔ 1658ء) دا شاعر اے۔ پیارے لال دے بزرگ نقل مکانی کر تے ڄام پور آن آباد تھے ہن ۔ اے لُلّہ گوت دے ہندو ہن تے چودھری سݙویندے ہن۔ کیفی صاحب دے اکھݨ موجب پیارے لال وݙے عالم فاضل آدمی ہن۔ فارسی تے سرائیکی ݙوہاں زباناں وچ شعر آہدے ہن۔ اُنھاں دی مثنوی ’’سراپ‘‘ ہندوواںدے وچ وݙی مقبول ہئی۔(93) اے مثنوی پیارے لال سرائیکی وچ لکھی ہئی۔
ایں مثنوی دا خلاصہ اے ہے کہ راجہ دسرت دے ہتھوں ہک بندہ مر ڳیا تاں اوندے پیؤ راجے دسرت کوں پلوتا ݙتا کہ تیکوں وی پرماتما اولاد دا ݙکھ ݙیسے۔ ٻڈھے دی دُعا قبول تھئی تے دسرت اپݨے پتراں رام چندر تے لچھمن دے فراق وچ تڑپ تڑپ تے مر ڳیا۔ پیارے لال بارے اے ساری تفصیلات اساں کیفی ڄام پوری دی کتاب سرائیکی شاعری وچوں گھندے پے ہن۔ ایں مثنوی دے ہر واقعہ کوں انج انج بحر وچ قلمبند کیتا ڳے۔ رام چندر دی تخت نشینی والی رات اجودھیا وچ خوشی دا سماں ݙیکھو:
دیپ جلائے ہر نر ناری
جگ مگ جگ مگ دھرتی ساری
دھرتی تے آکاش دی جوتی
تارے تارے موتی موتی
پرجاگیت خوشی دے ڳاوے
راجہ دسرت انگ نہ ماوے
رام دے سر تے مکٹ رنگیلا
لچھمن پھردا چھیل چھبیلا
سیتا گھونگھٹ وچ مسکاوے
وچ رنواس دے پیلاں پاوے
ہوئی اجودھیا نار نویلی
جیویں سینگیاں وچ سہیلی
کیکئی ویس وٹائے میلے
رووے گھر وچ کر انویلے
رووے ڈھاوے تے کرلاوے
بھرت کوں راجہ کون بݨاوے
پیارے لال مثنوی دے چھیکڑ اپݨے بارے تے اپݨے عہد دے بارے لکھدے:
لکھیا اینویں لکھن ہار
جو ہے ہر دا پالݨ ہار
چھٹیاں دیس ملیا پردیس
متھے اے کیش کلیش
(ڄام پور)جاں پور کیتا آ کر واس
ݙینہاں راتیں جی اُداس
سماں شاہی شاہجہان
لُلّہ گوٹ اساݙی جان
دیس اساݙا ہا کرݨال
نانواں میݙا پیارے لال
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان