پہلا پہلا پوسٹر (رفعت عباس)
حکایت
پہلا پہلا پوسٹر
(ایہ تریمت ہئی جیں حاکم دے خلاف ہوٹھیں اُتے پہلا پہلا پوسٹر لاتا'اوں سرخی نال ہوٹھیں اُتے لکھیا"لوک اپنڑی مرضی موجب جیونڑ چاہندن" )
ایہ گالھ پہلے شہر دے ہک شاعر کیتی'کجھ مدت تئیں بئے لوکی وی کٹھے تھی آئے'ہک ڈو کالج دے استاد'ڈو ترے شاگرد'سٹھ ورہے دا ہک ریٹائرڈ سپاہی'مشہور ہک کالم نگار تے جیڑھے ہوٹل وچ اوہ چا پیندے اوندے ڈو بیرے
کم بہوں نواں تے مَن چِھکواں ہئی'تریمتیں وانگوں ہوٹھیں تے سرخی لاونڑی'پُھلیں والے کپڑے پاونڑے'شہر بزار وچوں لنگھنڑا'قلعے دی چاڑھی اُتے چڑھنا تے لاہی اُتوں لاہنڑا'انہاں پُھلاں والے کپڑے پاتے'ہوٹھیں اُتے سرخی لاتی باغ وچ کٹھے تھئے'اوہ باغ وچوں سڑک اتے آ گئے چوک وچوں لنگھے بزار وچ پُج گئے'لوک پِچھوں ٹرے کِھلے وت رُک گئے'پولیس اگوں آ گئی گھیرا انہاں گھت گھدا ڈرایا دھمکایا پر جلدی پتہ لگ گیا ایہ لوک پولیس دی پکڑ وچ نی آندے'فوج اگوں آگئی بندوقاں انہاں تانڑ گھدیاں توپاں اگوں چھک آئے پر جلدی پتہ لگ گیا ایہ ڈیس دروہی کینھی'ملاں قاضی کٹھے اگوں تھی آئے 'انہاں بہوں شور مچایا رہ جَھلیا پر لوکی بئے پاسوں نکل گئے
حاکم کوں خبر وت مِل گئی جو کجھ لوکیں جلوس ہک کڈھیا ہے بغاوت ہک کیتی ہے'جنہاں پوسٹراں بینراں دی شہر وچ ہَٹک ہے اُنہاں ہوٹھیں اُتے لاتے ہِن'حاکم وت لشکر اپنڑا چاڑھیا پر چاڑھی اُتے چڑھدے اوہ لاہی اتوں لیہ گئے
اُنہاں شہر وچ تریمتیں وانگوں پورا ڈینہ گزاریا تےانہاں کوں پتہ لگیا جو تریمت ہوٹھیں تے سرخی لا تے ماہنڑو دی سُجاکی دا کتنا وڈا ہوکا ڈِتے. (رفعت عباس)