پِڑ آباد تاں اساں آباد
پِڑ آباد تاں......... اساں آباد "
پِڑ سج گیائے کجھ مزمانڑ اپڑ گئے ہن کجھ رستے وچ ہن اُڈوں ٹینٹ آلے اللہ اللہ کر کے ہنڑ ولائے ہسے پلیٹاں ،دیگاں، ٹپ، کرسیاں، کناتاں، تنبو، چُلہے، کاشت، ڈونگے ہر شئے گنڑ گَنڑ کے گنتی یاد تھی گئی اے. اُڈوں پکاوی آلے دماغ دی چٹڑیں بنڑائی کھلوتن ساکوں تاں ہالیں کوئی شئے پکا کے ننے ڈتی البتہ پنج دفعہ چاہ پی چُکن. چھور سارے بزرگاں دے حکم مطابق کِلی تے ٹنگے کھلوتن، گھبرو دے وال شال کٹا کے مُچھاں سیٹ کروا ڈتیاں گیاں ہن. کھارا پنج وجے ہوسی اس توں بعد گانہاں بدھاوی تے گھڑولی بھری ویسی. اسے ماروں سارے ٹکر کھا کے تیاریاں وچ لگ ویسن. پنج وجے چاچا نورنڑ پِڑ تے پہنچ ویسی تے وت راتیں چراں تئیں ساڈی ریت دا پرانڑاں جہان وت آباد تھی پوسی. گھومری سارے آپڑیں ہن انہاں کوں تاں سڈنڑ دی لوڑ کونئی پر عید گاہ آلی وانڈھی چوں بابے دے پرانڑیں سنگتی تے کجھ ساڈے یار خصوصی طور تے گھمر اچ شامل تھیسن. راتیں مہندی دی رسم ہوسی جس وچ گھبرو دے مسیر، پتریر تے ملویر گھبرو تے مہندی لیسن.
کجھ دوست لائیو کوریج دی خواہشمند ہن کوشش کرساں جو راتیں پڑ توں کجھ ویڈیوز آپ لوڈ کر سکاں اگر موبائل دی بیٹری وفا کیتی تاں. افضل عاجز صاحب کلہوکے لہوروں پیدل ٹُرے ہوئے ہن. کڑاہیاں، دیگاں تے چھپے ٹُکر آلے دیاں تصویراں انہاں کوں بھیج ڈتیاں گئین جس توں بعد انہاں قدم تیز تیز بھرڑیں شروع کر ڈتن امید اے جلدی پہنچ ویسن. پڑ آج وت آباد تھیندا پیا ہے اس دا مطلب اساں آباد تھیندے پئے ہاں..... دوست جیون پئے.(محمد ظہیر احمد مہاروی، ٢٦ نومبر ٢٠١٦ء)