پُھُلیں نال محبت
سیاݨے اَکھیندن پھل کھلدے چنگے لڳدن ، بھانویں نِکے ٻال ہوون تے بھانویں باغ دے پُھل ۔ گھر آلے ایکڑ ءِچ ݙاݙے سئیں دے اَمبیں دے ٻوٹے ہَن تے ربیل دے ڈھیر سارے ٻتھے، ساوݨ مُد کوں ربیل پھلیں نال جھری پی ہوندی ہئی ،خشبو دے گھلے گھلے کھڑے ہوندے ہن، مسیت ونڄݨ توں پہلے لپ پھلیں دی چا ویندے ہاسے تے سنگھدے ہاسے ، خشبو ہاں ٹھار ݙیندی ہئی تے دماغ دیاں ٻاریاں کھل ویندیاں ہن ۔ ݙاݙی کوڑیندی ہئی ، جئیں ایلے تیݙا ݙاݙا اسیکوں نہ ڄاݨدے تے نہ زمین دا حصہ ݙیندے توں ولا ولا اوندی جھولی ءِچ کیوں ونڄ وڑدیں ، ابا کائناں روکیندا ہا ،ہک واری ساوݨ مد کوں ڈھیر سارے اَمب تلے کریے پے ہن ، چُݨ تے جھولی بھر گھدی ، ݙاݙی دے ݙر کنوں گھر نہ ڳیُم ، نانی کوں ونڄ ݙتے ، ݙاݙی میݙے ݙاݙے دے ناں تے کوڑیندی ہئی تے نانی ٹھردی ہئی ، اوں ایلے تاں پتہ نہ ہا ، وݙے تھیوسے تاں رشتیں دی سونہہ رونہہ تھئی ، میݙی نانی میݙے ݙاݙے دی سکی بھیݨ ہئی ۔ ربیل دا پھل میکوں ݙاڈھا بھمدا ہا ۔ ابے نال میں ادّے اسماعیل تے ادے چوہدری غلام رسول دے باغ ءِچ ویندا ہم ، امب ، پنڈ ، ڄموں ، نبوئے تے سنگترے دے نال غلاب تے ٻے وی پھل ہن ، لائن دی وٹ نال ڈھنڈوں وی ہن ۔ مینھ دا پاݨی کٹھا تھی کھڑدا ہا ، کنول دے پھل ہوندے ہن ، سر تے نیلے رنگ دا پھل ، کچھڑ تے پبڑن دی ٹکی ،تل ءِچ بھ ، پٹ اَمدے ہاسے ، بھ دی بھاجی سوہݨی پکدی ہئی ، ہک پھُل لال غلاب وی ہا، لال غلاب دے نال ہک پھل کوں چھوئی موئی وی آکھدے ہن ، چھوئی موئی دا پھل ایجھا ملوک ہوندے جو ہتھ لائو تاں کملا ویندے ۔ ہک پھل سجھ منہ وی ہوندے ، سجھ جیرھے پاسے ڈھلدے پھل وی اوݙھائیں منہ کریندے ویندا ۔ ہندی ءِچ اینکوں سورج مکھی آکھدن۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان