پورھیا رمضان ارائیں
کربلا شناس شاعر، دلبرؔمولائی سرائیکی وسّوں تےکربلا دےکئی اشتراکات ہن. ݙوہیں دھرتیں دی بھوئیں ہکو سن٘ویں بھان٘داں ݙین٘دی اے.ایں توں علاوہ ٻئےوی کئی مشترکات ہن جنہاں دی وجہ کولوں سرائیکی وسّوں دےلوک کربلا دی بھوئیں دےایں واقعےکوں اپݨی دھرتی دا واقعہ سمجھدن اتےاتھاں تھیوݨ والےݙکھ کوں اپݨا گھروڳی ݙکھ سمجھدن. اِتھ ڳالھوں سرائیکی، شاعری دا وَݙا تے قدیم موضوع کربلا اے. مرثیہ سرائیکی دی مُنڈھلی اصناف وچوں اے، اتے اےصنف یکتار لکھین٘دی آندی اے. ہݨ وی اے صنف اینویں دی این٘ویں لِکھین٘دی پئی اے. جتھاں سرائیکی کربلائی ادب وچ ٻہوں سارے ناں ہن انہاں وچوں ہک ٻہوں معتبر اتےاہم ناں دلبؔرحسین مولائی دا اے. دلبؔرحسین مولائی اپݨی حیاتی محبت آل محمدؐ اتےسرائیکی زبان تےادب دےفروغ واسطےوقف کیتی ہوئی اے. اُو ہِک ہمہ جہت شخصیت ہن. انہاں دا قلم شاعری ہووےبھان٘ویں نثر ہک تار وڳدا پئے. ول شاعری دیاں ساریاں صنفاں انہاں دےقلم دی نوک توں نکلدیاں پئن، ایندےنال نثر وچ تحقیق، تنقید، مضامین توں علاوہ سرائیکی افسانہ وی او شاندار لِکھدِن. پیغام مومن انہاں دا سرائیکی تےاردو وچ لکھیل کربلائی ادب تےمشتمل مجموعہ اے. جین٘دےوچ حمد، نعت تےخانوادہ تطہیر نال عقیدت دا بھرواں اظہار ملدے. انہاں دی نعت وچوں ݙو شعر ملاحظہ کرو: ہِک ݙینہہ ضرور آساں میں سر دےبھرمدینے ݙکھڑےسُݨیساں سارےمیں رو عرض کرمدینے مُدت مُدام کولوں دلبؔر دی التجا ہے روضہ رسولؐ پہن٘چاں،تھیوے امر مدینے
سرائیکی ثنائی ادب وچ کلاسیکی شعراء تےاڄوکے شُعراء تےمصائب کربلا کُوں زیادہ بیان کیتے. انہاں دےکلام وچ درد دا سمن٘در لاتھے. پر اڄوکے عہد وچ مقصد کربلا بیان کرݨ دی ٻہوں لوڑ اے. دلبرؔحسین مولائی اپݨی رثائی شاعری وچ مقصد امام حُسینؑ بیان کرݨ دی کوشش کیتی اے. جیڑھی اڄوکےدور دی ضرورت اے. اَتے مقصد حُسینؑ واسطےاپݨی حیاتی دان کرݨی پووے تاں بندےکُوں پِچھوں تےنی ہَٹݨاں چاہیدا. ہُشیار تھیوو مومن نیواں عَلم نہ تھیوے قابو قدم رکھائےپچھےتےقدم نہ تھیوے مِشن حُسینؑ والا ہرگز ختم
نہ تھیوے
انہاں دیاں نظماں مُحسن انسانیت، علم دی چھاں تےپیغام مومن شاندار نظماں ہن. نظماں پڑھ تے انہاں دےتاریخ دےمطالعہ دی ݙس پون٘دی اےجو او کتنا تریخ دا مکمل تےشاندار مطالعہ رکھین٘دن. انہاں تخلیق توں علاوہ ترجمے وی ٻہوں خوبصورت کیتن. ہک زبان شاعری کوں ݙوجھی زبان وچ ڈھالݨ ٻہوں اوکھا کم اے. لیکن مولائی صاحب دا ترجمہ، ترجمہ نئیں نظردا بلکہ انہاں دی تخلیق نظردی اے. این٘ویں سرائیکی دےنال اردو کلام دی فنی تےفکری محاسن کنوں بھریل اے. پیغام مومن سرائیکی ادب وچ سوہݨا وادھا اے.