پنچر لواوݨ آلا
سڑک آلے کھوکھے تے سائیکلیں کوں پنچر وی لیندے ہاسے، پہلے نِکا پمپ ہوندا ہا ، ولا وݙا پمپ ابا گھن آیا ، شہر ابے دی ہک سائیکلیں آلے نال یاری ہئی اُوں کنوں ݙو آنے چار آنے چھ آنے دیاں پُراݨیاں ٹیوباں ابا گھن اَمدا ہا۔ چھوکرے غلولی دے رٻڑ بݨاوݨ سانگے گھندے ہن تے چنڳیں ٹیوبیں کوں پنچر لا تے رکھدے ہاسے ، چھ آنے ،اَٹھ آنے یا ݙاہ آنے دی وِک ویندی ہئی ، سوا روپے دی نویں ٹیوب ہوندی ہئی ، پنچر دے ݙو آنے ہوندے ہن۔
ہک آدمی پنچر لواوݨ آیا ، ٹیوب پُراݨی ہئی، گھیلی آیا ڈھیر پنچر ہن ، ابے آکھیا اَٹھ آنے دی پُراݨی ٹیوب گھن گھن پنچر نہ لوا، اُوں ضد کیتی ، ہک پنچر لائوں ، پھوک بھروں ٻیا نکل آوے، ٻیا لائوں ٻیا نکل آوے، ایویں کریندیں کریندیں پنج پنچر لڳ ڳے بندہ تھک تے قینچی نال ٹیوب کپ چھوڑی تے آکھیا اَٹھ آنے آلی ٹیوب پائو۔ ہک روپیہ ݙو آنے بݨ ڳے، ابے رعایت کرتے ٻارھاں آنے گھٖدے۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان