پلاک دا مسئلہ

اج کل پلاک دے مسئلے تے ڈھیر ساری ڈے گھن تھئی اے اتے تھیندی پئی ھے۔ جیرھے دوست، سرائیکی ادیب، دانشور نثر نگار شاعر پلاک نال چھوٹی وڈی سانجھ رکھیندن یا رکھنڑ چاہندن او بھلدن۔ ایندے نال سرائیکی قومی تحریک دا پندھ کھوٹا تھیندے۔ سرائیکی قومی تحریک اپنڑے قومی اسٹینڈ توں لہندی ھے۔ سرائیکی قومی تحریک تے لیکا لگدے۔ پنجابی دانشوریں دا دعوی' ھے جو سرائیکی زبان پنجابی زبان دا لہجہ ھے۔ ایندا مطلب اے ھے جو سرائیکی خطے اچ رہنڑ آلے لوک اپنڑاں قومی وجود نئیں رکھیندے۔ ڈوجھا مطلب اے ھے جو سرائیکیں دی 50 سالہ قومی جدوجہد بلاوجہ تے بیکار کوشش ھے۔ جیرھے لوک پنجابی زبان دی نمائندگی کرنڑ آلی تنظیم پلاک نال سانجھ رکھیندن انہیں دا اے عمل آپنڑیں سرائیکی قوم آپنڑیں سرائیکی زبان کوں پنجابی قرار ڈیونڑ آلے پنجابی دانشوریں دی ہاں وچ ہاں ملاونڑ ھے۔ پلاک نال سانجھ جوڑنڑ اپنڑیں قوم اپنڑیں زبان اپنڑیں ثقافت اپنڑیں تاریخ اپنڑے جغرافیے دی نفی کرنڑ ھے۔ اے حملہ آوریں دا پرانا منفی عمل ھے جتھاں قبضہ کرو پہلے اتھوں دے لوکیں دی زبان کھسو۔ غلام لوکیں کوں گنگا کرو جو او اپنڑے حقوق نہ منگ سگن۔ پلاک دے ذریعے حکومت پنجاب اے کم کریندی آئی اے۔ ساکوں ایندی مستقل سنجانڑ کرنی چاہیدی اے۔ جیرھے دوستیں پلاک نال کہیں سطح دی سانجھ کرنڑ دے عمل دی مذمت کیتی اے او سرخرو ہن۔ جیرھا قومی موقف دے وچ شامل نئیں تھیندا او کلہا تھی ویندے۔ پلاک نال کہیں سطح دی سانجھ نہ رکھنڑ دا فیصلہ جھوک فیضان فرید چنی گوٹھ دے وچ سرائیکی دانشوریں شاعریں اتے سیاسی کارکنیں دے کٹھ اچ 13 اپریل کوں تھی گیا ہا۔ اصغر گورمانی وی اوں کٹھ اچ شامل ہا۔ میڈے خیال اچ میٹنگ دے اعلامیے دی ویڈیو وی انہاں وائرل کیتی۔ مکمل پوسٹ فیس بک تے وی انہاں لئی۔ جھوک فیضان فرید دے وچ تھیونڑ آلے فیصلے توں پہلے سرائیکی لیجنڈ شاعر دانشور جناب رفعت عباس نے ایوارڈ اتے اوندے نال خطیر رقم کوں رد کریندئیں ہوئیں سرائیکی قوم دا نانواں اچا کیتا ول جہانگیر مخلص اوں عمل کوں اگونہا کیتا۔ باقی ایں بحث اچ جیرھے لوک شامل ہن مہتر تے مہاندرے لوک ہن۔ ایں ساری بحث دا نتیجہ اے نکھتے جو پلاک دے بارے سرائیکیں کوں پوری جانکاری مل گئی۔ باقی رفعت عباس صاحب کوں ملنڑ آلیں دھمکئیں دا مسئلہ اے تاں اے انتہائی قابل مذمت ھے۔

رفعت عباس دا مرتبہ اتنا بلند اے جو کہیں دی تڑی دھمکی اونکوں جھکا نئیں کر سگدی۔ باقی جناب رفعت عباس صاحب اپنڑیں ہک پوسٹ دے وچ ذکر کیتے جو اصغر گورمانی نے انہاں کوں آکھئے جو میں کجھ دوستیں دے علاوہ عاشق بزدار نال وی حال کیتا ہم تاں ایمانداری دا تقاضا اے ھے جو جیرھی گالھ میڈے نال کیتی گئی اے او میں ڈساں۔ انہیں دا آکھنڑ ہا جو ایف ایم ریڈیو دی سرائیکیں کوں ڈیونڑ دی پیشکش تھئی اے جیندے بارے کوئی فیصلہ کرنڑ دی اگر ضرورت ھے یا ضرورت کائنی تاں ایندے بارے سنگت بہہ تے کوئی رائے ڈیوے۔ میں اصغر گورمانی دی نیت تے شک نئیں کریندا کیوں جو اوں میکوں سٹریس نئیں کیتا۔ او دوستیں دے اتے چھڑیندا پیا ہا۔ اصغر گورمانی سرائیکی دا معتبر شاعر اے ہوندی گالھ دے اتے اعتبار کرنڑ دا حق اونکوں ملنڑا چاہیدا اے۔ اصغر گورمانی نال جناب رفعت عباس کوں دھمکی یا تڑی ڈیونڑ دے بارے استفسار کرنڑ تے انہیں ایندی صحت توں انکار کیتے اتے انہاں آکھیئے رفعت عباس صاحب میڈے سانگے قابل احترام ہن انہیں کو تڑی یا دھمکی ڈیونڑ دا میں سوچ وی نئیں سگدا۔ عاشق بزدار