پرہلاد

راج کُمار پرہلاد راجہ ہرناکشپ دا ساریاں کنوں نِکڑا ٻال ہَئی۔

پرہلاد کوں ساڑݨ دا واقعہ

اِیہ پاٹھ شالہ پڑھݨ وین٘دا ہون٘دا ہَئی۔ رستے وِچ کمبھار دا آواز پون٘دا ہَئی۔ ہِک ݙِین٘ہہ جہڑیلے اُوہ اِتّھوں لنگھیا تاں اُوں ݙِٹّھا جو کُمبھار ٻٹّھی کھول تے تھاں کڈھین٘دے پئے ہِن۔ پرہلاد ذری دیر کِیتے رُک ڳِیا۔ اَچّݨ چیتی جہڑیلے کُمبھاراں نے وِچلا تھاں کڈھیا تاں اُون٘دے وِچوں ہِک ٻلّی اَتے اُون٘دے ٻال نِکل آئے۔ پرہلاد وݙا حریان تِھیا جو تریہ ݙِین٘ہ تئیں ٻتّھی برابر ٻلدی رہی وَل اِیہ ٻلّی اَتے این٘دے ٻال کیویں ٻچ ڳئے۔ اُون٘دے دِل وِچ وِچار پَکّا تھی ڳِیا جو مہا راج راجہ ہرناکشپ کنوں اَن٘ج کُئی ٻئی طاقت ضرور موجود ہِے، جہڑی آپݨی مخلوق دی اِین٘ویں راکھی کرین٘دی ہِے۔ اُوں نے پاٹھ شالے ون٘ڄ کے آپݨے گُرو کوں اِیہ واقعہ ݙسیُس پَر اُوہ ٹال ڳئے۔ وَل اِیہ ہونہار ٻار محل وِچ وَل آیا اَتے مہا راج کوں برملا آکھ ݙِتّا جو تُساں خُدا کِین٘ویں تھی سڳدے ہِیوے۔ خُدا تاں اُوہ ہِے جئیں کمبھار دی ٻٹّھی وِچ ٻلّی اَتے اُون٘دے ٻالاں کوں سڑݨ کنوں بچایا ہِے۔ راجہ ݙاݙھا وِڳڑ ڳِیا، اُوں نے حُکم ݙِتّا جو اِیں گُستاخ کوں قلعے دی فصیل کنوں تَلّے سَٹ ݙِتّا ون٘ڄے۔ نوکر چاکر راج کمار کوں پَھد کے قلعے دی اُچّی فصیل اُتے گِھن ڳئے اَتے اُوکوں اُتّھوں کنوں تَلّے سٹ ݙِتّا۔ پَر حقیقی خالق نے اِیں معصوم موَحد کوں ٻچا گِھدّا اَتے تَتّے تیل دے کڑھا وِچ سٹوا ݙِتّا، پَر اُوکوں کُجھ نہ تِھیا۔ دریا وِچ غرق کرݨ دی کوشِت کِیتی ڳئی، مگر کُئی فَیدہ نہ تِھیا۔ راجہ دی بھیݨ رانی ہولکا جہڑی راجہ دی ہم خیال ہَئی۔ اُون٘دا دعویٰ ہَئی جو اُوہ ریاضت کر کے بَھا کوں مسخّر کر چُکی ہِے، اُوہ اِین٘دا وال وی نِھیں ساڑ سڳدی۔ اِیں کِیتے اُوہ راج کمار پرہلاد کوں جھولی وِچ گِھن کے چِتا اُتے ٻیٹھی۔ فضلِ ایزدی نال پرہلاد تاں صحیح سالم ٻچ نِکلیا پَر راݨی ہولکا سڑ کے سُؤاہ تھی ڳئی۔ تہوں اِیں عبرت ناک واقعہ دی یاد تازہ کرݨ کِیتے ہندو ہالی تئیں ہولی دا سَوَب منین٘دے ہِن اَتے اُوہ جاء جِتّھاں پرہلاد کوں ساڑݨ دی کوشِت کِیتی ڳئی ہَئی، ہِک مختصر جئیں کمرے دی شِکّل وِچ موجود ہَئی۔

راجہ ہرناکشپ دی موت

راجہ ہرناکشپ کوں جہڑیلے اِیں واری وی کامیابی نہ تھئیں تاں وِڳڑ ڳِیا۔ اُوں نے حُکم ݙِتّا جو لوہے دے کولے کوں بَھا نال تَتّا کر کے پرہلاد کوں اُون٘دے نال ٻدّھ ݙِتّا ون٘ڄے۔ تہوں سارا ݙِین٘ہہ اِیہ کَولا تَپدا رِیہا اَتے شام کوں جہڑیلے وشنو جی شیرِ نر دی شِکّل وِچ ظاہر تھئے اَتے راجے کوں آپݨے ڳوݙیاں وِچ دبا کے مار ݙِتّا۔ اُوں ݙین٘ہہ کنوں راج کمار پرہلاد "پرہلاد بھگت" دے ناں نال مشہور تھئے، اَتے ہِک مندر انّھاں دی یادگار دے طور تے اُساریا ڳِیا جہڑا ہُݨ تئیں پُراݨے قلعے اُتے موجود ہِے۔

ٻِیا ݙیکھو

• ملتان دے راجے۔
• راجہ جے بادین۔
• راجہ ہرناکشپ۔
• سورج مندر۔