پروین بابی

پروین بابی
(انگریزی : Parveen Babi)
معلومات شخصیت
ڄم	4 اپریل 1954(1954-04-04)ء جوناگڑھ، گجرات، بھارت
وفات	20 جنوری 2005(2005-10-20) (عمر  50 سال) ممبئی، بھارت
وجہ وفات	ذیابیطس
مدفن	سانتاکروز، ممبئی
شہریت	بھارت
عملی زندگی
پیشہ	ماڈل، اداکارہ
پیشہ ورانہ زبان	ہندی
کارہائے نمایاں	نمک حلال (فلم) ،  دیوار (1975ء کی فلم) ،  امر اکبر انتھونی ،  مجبور (1974ء فلم)
دستخط
	IMDB پر صفحہ

پروین بابی بالی وڈ دی ہک مشہور اداکارہ ہن۔ اوہ جونا گڑھ وچ پیدا تھئے۔ پروین احمد آباد یونیورسٹی وچ پڑھدیاں ہن کہ فلم "چریتا" وچ کم کیتا پر ایہ فلم ناکام تھی ڳئی۔ ایویں ہی انہاں دی ٻئی فلم "دھویں دی لکیر" وی ناکام تھئی۔ پر امیتابھ بچن دے نال انہاں دی اڳلی فلم "مجبور" نے انہاں کوں بالی وڈ وچ ہیروئن دے طور تے بے پناہ شہرت ݙے ݙتی۔ 1975ء وچ فلم "دیوار" ریلیز تھئی تاں انڈین فلم انڈسٹری کوں ایں ہیروئن ملی جیہڑی نہ صرف خوبصورت ہئی بلکہ کھلے والیں تے کم لباس دے نال نال اوہ اینجھے کردار ادا کرݨ کوں تیار ہئی جیہڑے سن ستر دیاں ٻیاں ہیروئناں کیتے ٻہوں "بولڈ" ہن۔ "دیوار" دے بعد "امر اکبر انتھونی" انہاں دی ہک ٻئی سپر ہٹ فلم رہی۔ انڈین فلم انڈسٹری تے پروین بابی دے اثرات دا ایہ ثبوت ہئی کہ امریکی جریدے "ٹائم" نے اپݨے سرورق تے انہاں دی تصویر شائع کیتی۔

فلماں توں ریٹائرمنٹ دے بعد تنہائی دی وجہ توں اوہ نفسیاتی مریض بݨ ڳئی تے اپݨے فلیٹ وچ انہاں دا انتقال تھی ڳیا۔ اوہ جیہڑے فلیٹ وچ رہندیاں ہن، اوندی سوسائٹی دے مینیجر نے ݙٹھا کہ ترائے ݙینہہ دے اخبار تے کھیر دے پیکٹ انہاں دے دروازے تے جمع ہن تاں اوں پولیس کوں فون کیتا۔ فلیٹ دا دروازہ تروڑ کے سڑی ہوئی لاش کوں پوسٹ مارٹم کیتے پٹھیا ڳیا۔

وفا تے بیوفائی دی ایہ داستان پروین بابی دی ہئی، جیہڑی ہیروئن دے طور تے مشہور ہئی تے جیندے کول دنیا دا تمام عیش و آرام تے دولت ہئی پر موت انتہائی کسمپرسی دی حالت وچ تھئی۔ "امر اکبر انتھونی"، "نمک حلال"، "کالیا"، "دیوار"، "سہاگ"، "دی برننگ ٹرین"، "خودار"، "رضیہ سلطانہ" جیسی سپر ہٹ فلماں دی ہیروئن جیہڑی دنیا دے مشہور رسالے "ٹائم میگزین" دے سرورق تے شائع تھئی۔ سن 70 تے 80 دے ݙہاکے دی ایہ گلیمر گرل، سیکس سنبل تے کروڑاں دلاں دی دھڑکن ہئی جیہڑی اپݨے فلیٹ توں ایں حالت وچ مردہ پائی ڳئی کہ شوگر وچ مبتلا تھی ڳئی ہئی۔ جسم تے زخماں دی وجہ توں گینگرین تھی ڳئی ہئی تے پورے جسم وچ کیڑے پئے ڳئے ہن۔ لاش دے نیڑے وہیل چئیر توں پتہ چلیا کہ اوہ چلݨ پھرݨ توں وی معذور ہن۔ پیٹ پھلیا ہویا ہئی تے جسم توں اٹھݨ آلی بدبو دی وجہ توں لوکیں دا کمرے وچ کھڑا تھیوݨ مشکل ہئی۔ تفتیش دے بعد پتہ چلیا کہ 90 دی ݙہاکے وچ ٻݙھی عمر، ناکام معاشقے تے مالی پریشانی دی وجہ توں پروین بابی گمنامی دی دنیا وچ چلی ڳئی ہن۔ کہیں کوں وی علم نہ ہئی کہ اوہ کتھاں ہن تے انہاں دے نال کیا تھیا۔ فلیٹ توں لاش ملݨ دے بعد پتہ چلیا کہ معروف اداکارہ اتھاں تنہا تے اکیلی رہندیاں ہن تے ذیابیطس نے انہاں کوں تروڑ کے رکھ ݙتا ہئی۔

گجرات دے جونا گڑھ دے مسلم کنبے وچ 4 اپریل 1954ء کوں پیدا تھیوݨ آلی انگریزی پوسٹ گریجویٹ تریمت دا ایہ عبرتناک انجام تھیا۔ فلیٹ توں اٹھݨ آلی بدبو تے دروازے دے ٻاہر جمع اخباریں تے کھیر دے پیکٹاں نے ہمسائیں کوں متوجہ کیتا۔ ترائے ݙیہاڑے تک ایہ ڈھیر ݙیکھݨ دے بعد انہاں نے پولیس کوں اطلاع ݙتی جیندے بعد پروین بابی دی موت دا راز 22 جنوری 2005ء کوں فاش تھیا۔ اپݨیاں اداواں نال کروڑاں لوکاں دے دلاں دی ملکہ بݨݨ آلی ایں طرح مردہ پائی ڳئی کہ لاوارث جانور وی شرما ویندے۔ کوپر اسپتال وچ پوسٹ مارٹم دے بعد پتہ چلیا کہ اوہ ترائے ݙینہہ توں فاقے دی شکار ہن تے انہاں دے پیٹ وچ دوا دے جز الکحل دے علاوہ کجھ وی نہ ہئی۔ ݙوجھے ݙینہہ 23 جنوری کوں تدفین دے بعد عدالت نے جونا گڑھ دے بینک وچ موجود انہاں دے اثاثے کوں ترائے جاہیں تے ونڈ ݙتا۔

ایہ الڳ ڳالھ ہئی کہ جاہ دی کمی دی وجہ توں نہ صرف پروین بابی بلکہ محمد رفیع، نوشاد، مدھو بالا، ساحر لدھیانوی تے طلعت محمود جاہیں معروف فلمی شخصیات دے نال قبرستان دی تجدید کاری وچ 16 فروری 2010ء کوں مزید ترائے فٹ مٹی دے ٻوجھ تلے بے نشان تھیوݨا پیا۔ بصورت دیگر عامر خان دے پیو طاہر حسین کتھاں دفن تھیندے کہ ممبئی دے جوہو گارڈن دے سامݨے واقع جوہو مسلم قبرستان وچ 5 سال پہلے ایویں ہی ٻئی بھرائی تھئی ہئی۔ بلا مبالغہ ٻیاں شعبیاں دی طرح فلمی دنیا انساناں دی بدولت ہی آباد ہئی، ایہ الڳ ڳالھ ہئی کہ مادیت پرستی تے حرص و ہوس نے انہاں کوں کتھائیں دا نہ چھوڑیا۔ سرمایہ دارانہ دجالی نظام زندگی وچ لوک کولھو دے ݙاند دی طرح جتے ہوئے ہن، ایں توں پہلے کہ دنیا بے کسی دی موت توں عبرت حاصل کرے، کوشش کرو کہ اللہ تے اوندے رسول صلی اللہ علیہ وسلم دے احکامات تے سنتاں تے چلیا ونڄے، سدھی تے سادہ زندگی گزاری ونڄے تے دنیا وچ رغبت ڳھٹ کر کے آخرت دے بارے وچ سوچیا ونڄے۔

حوالہ