پروفیسر کمال الدین خاکی

اصل ناں       کمال الدین

تخلص          خاکیؔ

ڄمنْ            1962ء

تعلیم            ایم اے (اردو)

پیشہ            معلم

فون نمبر         0341 7546332

          جاہ پتہ         شاہ والا جنوبی تحصیل نور پور تھل ضلع خوشاب

پروفیسر کمال الدین خاکیؔ میݙے بٖانہہ بٖیلی، دوست تے محسن ہِن ،ایں کتاب دے سلسلے وچ ضلع خوشاب (نور پور تھل) دے شعراء  دا کلام تے کوائف آپ نے بھڄوائے ۔میں آپ دا تھورائت ہاں۔ نمونہ کلام۔

غزل

شہنشاہی تاں روحاں دی زمانے تھوں گزر ڳئی ہے

چلا انج دور مادے دا محبت کوچ کر ڳئی ہے

ایں خود غرضی دے صحرا وچ پیا ٹُرناں عمر ساری

نہ چھاں ہے کئی مروت دی میݙی جے تئیں نظر ڳئی ہے

فلک دو اݙ کے میں جھولی نواکے سیس رڄ منگیا

نہ دردِ دل ہا خس جتنا دعاء ہر بے اثر ڳئی ہے

اے مادہ ،مال، زر فتنہ ایں تھوں گھٹ ہن سبھے فتنے

اے چودہ سو ورھیں دی ڳل تیݙے دل تھوں اُتر ڳئی ہے؟

قصے مہر و وفا دے اڄ سُنْاواں ونڄ کتھے خاکیؔ

روحانیت زمانے تے جݙاں کُھٹ گُھٹ کے مر ڳئی ہے