پتن منارے دا چرن

پتن منارا رحیم یار خان شہر توں تقریباً چھی میل جنوب اِچ واقع ہے ۔ اتھاں ہک ٻہوں اُچے ٹٻے تے ہک عظیم الشان شہر تے دریائی بندرگاہ دے آثار موجود ہن۔ ماہرینِ آثار قدیمہ اینکوں وادیٔ ہاکڑہ دا ہک قدیم ترین شہر قرار ݙیندن۔ کݙاہیں اے شہر سمراداں دا دارالحکومت ہئی۔ سمراواں دا آخری راجہ ھمیر ایں تے حکومت کریندا ہا اوندا ہمسایہ راجہ جوپھل وݙا (موجودہ رحیم یار خان) دا حاکم ہئی تے اپݨی سخاوت دی وجہ توں ٻہوں مشہور ہئی۔ راجہ رکھیّا ہک چرن سوامی کوں کجھ گھوڑے انعام وچ ݙتے مگر پتن پور (پتݨ منارہ) وچ اوندے اے گھوڑے چوری تھی ڳے۔ چرن کوں یقین ہئی کہ اے گھوڑے ھمیر تے اوندے وزیر دی منشا نال چوری کیتے ڳن۔ چنانچہ اوں ھمیر دی ہجو اِچ ہک نظم آکھی۔ جیندے ترائے مصرعے ایں ہن۔ بہاول پور گزیٹر وچ اے مصرعے درج ہن۔

دھاڑی دھوڑا رائے جیہنہ چرن سانکھیا

پتن پٹیجو تھیو سیج وٹایو راہ

ھمیرا پورا راج  نہ کندا  سمرا

(ترجمہ):(دھوڑا رائے لٹیرا ہے جیں چرن کوں لُٹ گھدے۔ پتݨ برباد تھی ونڄے تے دریا اپݨا رستہ تبدیل کر ونڄے تے دھمیرا سمرا پورا راج نہ کر سڳے) ھمیر دی تاریخ وفات 752ہے۔ ڈاکٹر مہر عبدالحق انھاں اشعار کوں 752ھ توں پہلے دی تصنیف آہدن۔

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان