پتمبر داس
محمد افضل دی نوکری حیدر آباد تھئی ۔ حیدر آباد دی فضا ٹھیک گرمیئیں وچ وی شام کوں چار وڄے توں بعد ٹھڈی تھی ویندی ہے ۔ ہوا وچ خنکی ، مزاج برتر کر ݙیندی ہے۔ اُوں ویلے لوک تروتازہ تے خوش نظر آندے ہن۔ پتمبر داس دی رہائش حیدر آباد اِچ ہئی تے اوندا کاروبار عمر کوٹ وچ۔ ہر سوموار کوں پتمبر داس سویر نال حیدر آباد کنوں سفر کریندا ہا تے عمر کوٹ پُڄ ویندا ہا۔ وَل اُو ہر چھݨ چھݨ دی شام کوں بس تے سفر کر تے واپس جھِکی عصر دے نیڑے حیدر آباد پُڄ ویندا ہا۔ محمد افضل دی یاری پتمبر داس نال ہک سال پراݨی ہئی۔ جیڑھی ہولے ہولے گھاٹی تھیندی ڳئی۔ ایں دفعہ پتمبر داس فون کر تے محمد افضل کوں آکھیاجو اُو شام کوں عمر کوٹ توں واپسی توں بعد تیݙے حیدر آباد دفتر وچ حاضری لویسی۔ لحظہ کھن کٹھے گزارݨ توں بعد اُو اپݨے گھر چلا ویسی۔ حیدر آباد اِچ محمد افضل دا دفتر میر پور خاص بَس اݙے دے نال ہا۔ جݙاں جو پتمبر داس دا گھر حیدر آباد شہر دے پرلی طرف قاسم آباد ہا۔ محمد افضل پتمبر داس دی انتظار کیتی۔ ݙتے ہوئے ٹائم دے مطابق پتمبر داس محمد افضل دے دفتر پُڄ ڳیا۔ محمد افضل چائے دا انتظام کیتا تے اُوندے بعد کھاݨے دا اہتمام کیتا۔ کھاݨے توں فارغ تھی تے پتمبر داس اجازت منگی تاں محمد افضل اُونکوں اپݨی کار اَتے ڈرائیور دی پیشکش کیتی۔ پتمبر داس آکھیا: میں تیݙی کار تے نی چڑھدا۔ میں رکشے تے آپݨے گھر ویساں۔محمد افضل آکھیا: میݙی نیوماڈل کار کرولاجے میݙے دوستیں دے کم نی آندی تاں اُو میݙے کیڑھے کم دی؟ تساں میݙی کار تے ویسو۔ پتمبر داس جواب ݙتا میں کہیں وی صورت تیݙی کار تے اپݨے گھر نہ ویساں۔ میں ہمیشاں کنوں رکشے تے آندا ویندا تے میݙے واسطے رکشا ہی ٹھیک ہے۔ محمد افضل ہک نہ مَنی۔ دفتر دا گیٹ کھُلا تے ڈر ائیور کوں آکھیا: کار ٻاہر کڈھ۔ پتمبر داس محمد افضل دا ہتھ پکڑ تے برآمدے وچ پَئی کرسی تے ٻہہ تھیا تے اُونکوں اپݨی نال ݙوجھی کرسی تے ٻلہا تے سمجھایا۔ پتمبر داس آکھیا: محمد افضل تو ݙیکھ میں ہندو ہاں تے ٻہوں د ور دی سُچینداں۔ جے کر میں تیݙی کار تے ٻہہ تے گھر ونڄاں تاں ا گر رستے وچ کار کھسیج ونڄے تاں توں ایف آئی آر اِچ میݙا کار اِچ ٻیٹھا ہویا لکھویسیں تاں میں تیݙی کار دیاں پیشیاں بھڳیساں تے عمر کوٹ کاروبار کیویں کریساں؟ݙوجھی ڳالھ تیݙی کار تے جے کر میں آپݨے گھر دے قریب ونڄ تے لہساں تاں لوک میکوں نویں کار گھِنݨ دیاں مبارکاں ݙیسن تے میں آکھساں ایہہ میݙی کار نئیں میݙے دوست دی کار ہے۔ جئیں میکوں گھر بھڄوائے۔ تاں لوک آکھسِن، پتمبر داس لوکیں دیاں کاراں استعمال کریندے ۔ ایہہ میݙے واسطے ٻہوں تکلیف والی ڳالھ ہوسی۔ انہیں سارئیں ڳالھیں دا تے خطرات دا ہکو حل ہے جو میں پندھراں روپے رکشے دا کرایہ کیوں نہ چا ݙیواں۔
٭٭٭
حوالہ
[لکھو | ماخذ وچ تبدیلی کرو]کتاب: وتر ساخ (سرائیکی کہاݨیاں) ، مصنف : عبداللطیف بھٹی، ناشر: جھوک پبلشرز ،ملتان