پاݨی دے دِلے
سڑک آلے کھوکھے تے ابّے سئیں کمبہاریں دی وستی ءِچوں چار مٹکے پاݨی دے منگوائے ، سویلے ٻالٹی چا تے چاچے غوثو آلی کھوئی توں بھر اَمدے ہاسے ، خطابیں ءِچوں ودھݨ جمالی اساں ساریں ءِچوں وݙا ہا ، کھوئی ءِچوں ٻوکے اوہو چھکیندا ہا ، دِلے ݙو خطابی رَل تے چیندے اساں ہاسے ،سوتر رشید احمد رَل تے دِلیں دے اُتوں ٻوریاں پُسا تے لیندے ہاسے ، پاݨی پیوݨ سانگے مٹی آلیاں ݙولیاں ہوندیاں ہن ۔ ہر آیا ڳیا پاݨی پیندا ہا تے سہی کڈھیندا ہا ، راہ وٹائو نال حال حویلہ کرݨ دا رواج ہوندا ہا ، ابا سئیں ہر آئے ڳے کنوں حال حوال گھندے ہن ، ابے سئیں دی ڈھیرساری سونہہ بݨ ڳی ہئی، سائیکلیں آلے ڈھیر ہوندے ہن ، اُٹھیں دیاں قطاراں وی ہوندیاں تے ڈھیر لوک پیریں دا پندھ کریندے ہن۔ خان پور اپݨا پریس لڳا تاں چاچا جان محمد دھریجہ رفیق شریف ، اسلم شفیع تے اکرم دے ابے میکوں آ تے مبارک ݙتی تے آکھیس تئیں نِکے لا پاݨی بھر بھر تے پلائن، شیت اللہ راضی تھی ڳے۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان