پاکستان وِچ ہندو شادی دے قنون

پاکستان وِچ ہندو شادی

پاکستان وِچ ہندو شادیاں کِیتے ݙو قوانین ہِن۔ ہِک سندھ ہندو شادی قانون 2016ء ہِے جو پاکستان دے صوبہ سندھ وِچ لاگو ہِے تے ݙوجھا 2017ء دا ہندو شادی قانون ہِے جو اسلام آباد دارالحکومت، بلوچستان، خیبر پختونخوا تے پنجاب صوبیاں وِچ لاگو ہِے۔ تاہم، ݙو ہندوواں دے درمیان شادی رجسٹر کرݨ کِیتے کوئی قوانین تے ترامیم کائنی کِیتیاں ڳئیاں ہِن- ہِک سندھ تُوں تے ݙوجھا ٻئے صوبے تُوں (اسلام آباد دارالحکومت، بلوچستان، خیبر پختونخوا تے پنجاب)۔

سندھ ہندو شادی قانون 2016ء

اِیہ پاکستان وِچ پہلا ہندو شادی قانون ہِے۔ اِیہ صوبہ سندھ وِچ رہوݨ آلیاں ہندوواں تے لاگو ہِے۔ سکھ تے زرستری وی اِیں قانون دے تحت اپݨی شادی رجسٹر کروا سڳدے ہِن۔

ہندو شادی بل 2016ء سندھ دے پارلیمانی امور دے وزیر نثار احمد کھوڑو نے پیش کِیتا۔ فروری 2016ء وِچ سندھ دی صوبائی اسمبلی نے بل منظور کِیتا۔ اِیں قانون دے مُطابق 18 سال تُوں وَدھ عمر دا کوئی وی ہندو مرد تے عورت اپݨی شادی رجسٹر کروا سڳدے ہِن۔

2018ء وِچ، جوڑیاں کِیتے طلاق تے ݙوبارہ شادی دے حقوق تے طلاق دے بعد بیوی تے ٻالاں دی مالی حفاظت کِیتے قانون وِچ ترمیم کِیتی ڳئی۔ اِیہ ترمیم پاکستان مسلم لیگ فنکشنل (پی ایم ایل-ایف) دے رکن اسمبلی نند کمار گوکلانی نے تجویز کِیتی ہَئی۔

2018ء وِچ، ضلع میرپور خاص وِچ سندھ ہندو شادی قانون دے تحت پہلی بین ذات ہندو شادی رجسٹر کِیتی ڳئی۔

ہندو شادی قانون 2017ء

اِیہ ہندوواں کِیتے وفاقی سطح دا پہلا ذاتی قانون ہِے۔ اِیہ اسلام آباد دار الحکومت، بلوچستان، خیبر پختونخوا تے پنجاب صوبیاں وِچ رہوݨ آلیاں ہندوواں تے لاگو تھین٘دا ہِے۔ ہندو شادی بل 2016ء وِچ انسانی حقوق دے وزیر کامران مائیکل نے پیش کِیتا ہَئی۔ اِیں کوں 2016ء وِچ پاکستان دی قومی اسمبلی نے متفقہ طور تے منظور کِیتا ہَئی۔ 2017ء وِچ ایوان بالا پاکستان نے اِیہ بل منظور کِیتا۔ مارچ 2017ء وِچ، پاکستانی صدر ممنون حسین نے ہندو شادی بل تے دستخط کِیتے تے اِیں طرح اِیں کوں ہِک قانون بݨا ݙِتّا۔ اِیہ بل ہندوواں کِیتے شادیاں تے طلاق دے رجسٹریشن دے ضوابط دی راہ ہموار کرین٘دا ہِے تے مرداں تے عورتاں کِیتے شادی دی گھٹ تُوں گھٹ عمر 18 سال مقرر کرین٘دا ہِے۔