پاکستانی دور دا ݙوجھا حصہ… جدید شاعری
سرائیکی شاعری حضرت خواجہ غلام فرید سئیں دے بعد اساکوں کجھ عرصہ واسطے یکسانیت دا شکار لڳدی اے۔ اوندی ٹور کوں اڳوں تے ودھاوݨ دی خاطر خرم بہاول پوری تے انھاں دے بعد یتیم جتوئی اپݨے اپݨے انداز اِچ ادبی اضافے کریندن۔ مگر انھاں ݙوں شاعراں دے علاوہ ایں دور دے باقی تمام شاعر پچھلے دور دی باقیات ݙسدن۔ اوہو روایتی انداز تے اظہار دا پراݨا رنگ انھاں دے کلام وچ نظردے۔ یتیم جتوئی دے بعد سرائیکی ادب وچ ہک ٻئی آواز جانباز جتوئی دی اُبھردی ہے۔ جانباز اسٹیج تے آ تے اپݨے مخصوص گھن گرج والے انداز اِچ معاشرتی موضوعات تے نظماں پڑھدے تاں پڑھے لکھے ذہن اوندی شاعری دی طرف متوجہ تھیندن۔ ایں توں علاوہ ملتان وچ ریڈیو سٹیشن دے قیام نال شعراء کوں اردو ‘ سرائیکی ملوڑ مشاعرے پڑھن دا موقعہ ملدے تاں او لاشعوری طور تے اردو شاعری توں متاثر تھیندن۔ ایں توں علاوہ ایں دور وچ ڈھیر سارے اردو دے او شاعر جنھاں دی مادری زبان سرائیکی ہئی۔ سرائیکی کوں ذریعہ اظہار بݨیندن تاں جدید شاعری دا رنگ خود بخود سرائیکی وچ اپݨی بہار ݙکھاوݨ لڳدے۔ ݙٹھا ونڄے تاں 1960ء توں 1965ء دے درمیان سرائیکی زبان دی شاعری وچ جدید رنگ نشابر تھیوݨ شروع تھی ویندے تے اے نویں رویے ٻہوں جلدی شعری ادب دا تکڑا حصہ بݨ ویندن تے 1971ء دے بعد سرائیکی زبان وچ جدید شاعری پوری آب و تاب نال تخلیقی سطح تے اپݨا ہوکا سکہ ڄمیندی اے۔
سرائیکی شاعری دا جدید دور اَڄٖاں جاری ہے۔ اتنی جلدی شعراء دے مقام بارے کوئی حتمی فیصلہ ممکن کینی۔ ہِیں کیتے اساں ایں دورے دے کجھ نمائندہ شعراء دا مختصراب تذکرہ کریندوں۔
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان