پاکستانی دور دا اَڄوکا ترکہ
سرائیکی شاعری دے ارتقاء اُتے اے تحقیقی کم 15جون 1988ء کوں توڑ پُڄیا ہئی۔ ایں مقالے وچ کوشش کیتی ڳئی ہئی اوں ویلے تئیں دے سبھے نمائندہ شعراء دا کلام تے انہاں دا ذکر ایں وچ شامل تھی ونڄے پر وَل وی کئی شاعر اوں ویلے اُک ڳئے ہن ۔ صرف انہاں دی ہک فہرست شامل کر ݙتی ڳئی ایندی وجہ صرف وقت دی کمی تے اے مجبوری جو بروقت اے تحقیقی مقالہ جمع تھی ونڄے۔ ورنہ فہرست وچ شامل کئی شعراء اپݨے شاعرانہ مرتبے اور فنی وݙائی دے اعتبار نال ایں قابل ہن کہ انہاں دا تفصیلی جائزہ شامل کیتا ونڄے۔ مثلاً سئیں سید قاسم جلال ‘ سئیں پروفیسر مظہر مسعود ‘ سئیں فدائے اطہر‘ سئیں حیدر گردیزی ‘ محترمہ فرحت نواز وغیرہ ۔
ایندے بعد سرائیکی زبان دی جدید شاعری کئی ایجھے شاعر اُبھرئیے جنہاں نے اپݨے کمال فن تے شاعرانہ وݙائی نال شاعری وچ ہیئت دے نویں تجربے کیتے۔ نویں موضوعات ‘ نواں اسلوب ‘ نویں لفظیات ‘ نویں تلازمے تے نویکلے استعارے شاعری وچ شامل کر تے سرائیکی شاعری کوں جدید عہد دی مکمل تے وݙی شاعری دا سوبھ عطا کیتا۔
ایں ویلے نہ تاں اے ممکن ہے تے نہ اِی مناسب کہ ضمیمے دے طور تے انہاں شعراء دا مختصر ذکر کر ݙتا ونڄے۔ مناسب ایہو ہے کہ پاکستانی دور دے جدید شعری ترکے تے نویں سروں پوری تفصیل نال ایندا مکمل جائزہ پیش کیتا ونڄے۔ ایں ویلے صرف ایں مقالے وچ 1988ء تئیں دے نمائندہ شعراء دے ذکر تئیں اے ارتقائی جائزۃ توڑ پڄدا پئے لہٰذا اَڄوکے دور دے نمائندہ شعراء رفعت عباس ‘ اشو لال ‘ خالد اقبال ‘ عبداللطیف بھٹی ‘ اللہ بخش یاد ‘ ارشد خامر ‘ جہانگیر مخلص ‘ امان اللہ ارشد ‘ ممتاز عاصم تے ٻئے ڈھیر سارے لکھینڑیں شعراء دا تفصیلی ذکر تے فنی ویورا کرݨ قرض اے۔
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان