پارٹیکل فزکس دے بنیادی ذرات

سائنس اچ ترقی ہمیشہ کݙاہوں تھیوری تے کݙاہوں تجربے نال تھیندی اے۔تھیورسٹ نویں نظریات  بݨیندن تے تجربے کرݨ والے  انیں نظریات کوں ثابت کریندن۔پچھلے 20 سال اچ  تھیورسٹ نے ذراتی طبیعات اچ  زیادہ کم کیتے۔

ہر بنیادی ذرے نال ہوندا ضدذرہ وی لازمی ہوندے۔جیویں جو الیکٹران دا ضد ذرہ پازیٹران  ہوندے ۔جیڑھے اینجھے ݙو ذرے آپت اچ  ملدن تاں ہک ٻے کوں فنا کر تے غائب تھی ویندن تے ہنیں دی توانائی روشنی دے ذرے فوٹان اچ تبدیل تھی ویندی ہے ۔ بنیادی ذرات دا مطالعہ نظریاتی فزکس اچ سب توں زیادہ ہیجان تے جوش پیدا کرݨ والا ہا کیوں جو اے مطالعہ فلسفہ تے ریاضی دی حدود نال ونڄ رلدے۔ ذرہ جتنا چھوٹا تے عارضی ہوسی اتنا ہی ہوندے مطالعے واسطے قیمتی تے ٻہوں وݙے پیمانے دا ساز و سامان درکار ہوسی۔ انہیں ذرات دا مطالعہ ایکسیلیٹرز دے مراکز وچ کیتا ویندے ۔ انہیں دی تعمیر تے کئی ملین ڈالر خرچ کیتے ویندن تے ہزاراں ٹن سیمنٹ تے سٹیل استعمال تھیندے۔ امریکہ اچ بروک ہیون [BROOKHAVEN]، روس اچ ڈوبنا [DUBNA]اور جنیوا اچ سرن [CERN]دنیا دے اہم ایکسیلیٹرز دے مراکز ہن۔ انہیں اچ کم کر تے ماہرین ایں قابل تھی ڳن کے او نہ صرف ایٹمیں دے مراکز دی ساخت کوں ڄاݨ ڳن بلکہ سب توں چھوٹے ذرے نیوٹرینو[NEUTRINO] تک پُڄ ڳن۔ نیوٹرینو اینجھا ذرہ اے جیندی نہ کوئی کمیت ہوندی اے تے نہ کوئی چارج ہوندے۔ ایندا ݙوجھے ذرات نال تعامل یا ری ایکشن ٻہوں کمزور ہوندے۔ ایں وجہ کنوں اے زمین اچوں گزر ویندن۔ سوئٹزرلینڈ دے سائنسدان وولف گانگ پالی [WOLFGANG PAULI]نے 1928 اچ نیوٹرینو دی پیش گوئی کیتی۔ ایں ذرے نے مادے دی بناوٹ اور کہکشاں دے ارتقا اچ ٻہوںاہم کردار ادا کیتے۔

ؓٻہوں تھوڑی عمر دے تے ٻہوں چھوٹے ذرات دا وجود اے ظاہر کریندے جو دنیا بارے ساݙا عام تجربہ ٻہوں محدود اے۔ ٻہوں ساریاں اینجھیاں چیزاں کائنات اچ موجود ہن جنہیں دا ساکوں حالی تک ادراک کینی۔   

حوالہ

کتاب: کائنات دا سفر ، مصنف : جعفر عباس بزدار ، ناشر: جھوک پبلشرز ملتان