ٻکر والاں تے ملاحاں دے گیت

سرائیکی زبان وچ آجڑی ‘ مہینوال،ٻکر وال ہمیشہ شاعری داموضوع ریہن۔ دریا دی بِھک تے یا تھل دی بکل وچ ڳنویں ‘ منجھیں تے ٻکریاں دے اَڄڑ چھیڑی اے ٻکر وال ‘مہنیوال ‘ ونڄھلیاں ‘ بانسریاں ‘ الغوزے تے نڑ وڄا تے اپݨا دل پرچیندے رہ ویندن۔ مہنیوالیں دا ہک لوک گیت جیڑھا سندھ دریا دے کنڈے تے ڳایا ویندے:

مل ڳئی ہے شام دی بانگ

تے منجھیاں جلدی ٹرو

میکوں ہے یار دی تانگھ

تے منجھیاں جلدی ٹرو

فجر دیاں چھڑیاں اَڄݨ نی رڄیاں

لڑوے ازلی نانگ تے منجھیاں جلدی ٹرو

قدم  کوں چاوئو  یار ملائوو

اللہ کریسی سانگ تے منجھیاں جلدی ٹرو(57)

پتݨ کوں سرائیکی شاعری وچ پار پُڄاوݨ ‘ وچھڑئیے ملاوݨ تے منزلاں تے پُڄاوݨ دی علامت آکھیا ڳے۔ دریا دی ہک مݨ توں ݙوجھی مݨ تئیں پُور پُڄاوݨ کیتے۔

ملاحواں دا ہک قدیم دعائیہ گیت

ٻیڑے کوں کندھی لا

لا وے سیاں ساکوں تیݙا آسرا

ٻیڑا ساڈا پُر پُر بھریا

آپ نبی جی قدم دھریا

اُتوں مینگھ ملہار سیاں

ٻیڑے کوں کندھی لا

ٻیڑا اساݙا لوݨ دا بھریا

آپ نبی جی قدم دھریا

مصری کر پجا ٻیڑے کوں کندھی لا

اُتوں مینگھ ملہار سئیں آں ٻیڑے کوں کندھی لا(58)

سرائیکی زبان وچ کئی لوک شاعری دیاں خالص اصناف  وی موجود ہن جنہاں وچ وسیب دے ورت ورتاوے تے وس وسیبی چسّاں دا سواد ملدے۔ لوک گیتاں دیاں انھاں صنفاں دیاں اپݨیاں طرزاں تے ڳاوݨ دا ہک نویکلاانداز ہے۔

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان