ٻکری ساوی تھیوݨ دی تریخ
میکوں یاد اے ٻکری ساوی تھیوے ہا تاں کاپی تے ابا سئیں تاریخ لِکھ رکھدے ہن تے ولا مہینے ڳنڑدے ہن ، پنجویں مہینے ٻکری وِیا پمدی ہئی۔ٻکری کوں واہر چاوے ہا تاں نسلی چھیلے توں ساوا کرایا ویندا ہا، چھیلے آلا سیر ݙو سیر داݨے گھندا ہا ، ابّے سئیں دے مال ءِچ ڳبھݨ ،سُواء دے نال پٹھاں تے جھیرٹاں وی ہوندیاں ہن ہک ٻکری دا ناں فقیرݨی ہا جیڑھی جو کنواری ہئی تے کھیر ݙیندی ہئی ، دولتی پرے پرے توں ݙیکھݨ اَمدے ہن،ابے سئیں کوں ٻکریں دا ایجھا شوق ہا جو آکھ تے بس چاکر۔ کوئی بھانویں کُوڑ مار ݙیوے ہا جو فلانی جھاہ تے اعلیٰ نسل دی سوہݨی ٻکری کھڑی اے ، نہ وی گھنݨی ہووے ہا ،سائیکل چھِک تے بھڄ پمدے ہن ، گھر ء ِ چ ہک نِکی صندوق ہئی جیندے وچ زناوریں دے گہݨے ہن ،پٹڑیاں ، جھانجھر، حمیل، ڈھولݨے ،گھونگھرو، ڳانیاں ، متھیلاں ، ٹلیاں تے ہسیاں تے ٻے گہݨے ہوندے ہن۔ رسے کھٻڑ تے زنزیراں وی اوندے وچ رکھیندے ہن۔ابے سئیں دی زناوریں دے حکیم نال یاری ہوندی ہئی،مال کوں ڳل گھوٹو ،مُہاڑا، منہ کھُر تھیوے ہا تاں حکیم کوں ونڄ تے سݙ اَمدے ہن ،جیویں بندے دا علاج تھیندے اونویں علاج کرویندے ہن ،ابے سئیں دُمبے وی رکھے ہن پر اُنہاں کوں سب توں وَدھ شونق ٻکریں دا ہا ،ٻکری دے ویاوݨ دے ݙینھ نیڑے آون ہا تاں گنتری شروع تھی ویندی ہئی جو فلانے ݙینھ تک ٻکری وِیاہ پمسے، ٻکری ویاوݨ کیتے سُلیتی تھیوے ہا تاں ابے اماں کوں فکر لڳ ویندی ہئی ، ݙو پھل ترائے پھل ،چار چار پھل ٻکریاں ݙیندیاں ہن ،ویاوݨ ویلھے ٻکری اپݨی دٖائی آپ بنڑدی ہئی ،پھل ڄما تے اُنہیں کوں چٹیندی ہئی تے ایویں صاف ستھرا تے سوہݨا بݨا ݙیندی ہئی ،جیویں پھلیں کوں کئی ایل میل لڳی وی نہ ہووے۔ پھل صاف تھی ویندے ہن ،چا تے خُش تھیندے ہاسے ،بعض پھلیں دے ناں وی رکھیند ے ہن ،تے ناویں تھیندے ہن جو اے پھل ایندا تے اے پھل ایندا۔ایں ڳال دی اُوں ویلے سُدھ نہ ہئی ہُݨ پتہ لڳے جو ابے سئیں ٻکریاں کیا پالیاں ہن ٻکریں نال اسیکوں پال ڳن۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان