ٻڈھیپے دیاں کہاݨیاں

ٻڈھیپا حیاتی دا ہک محفوظ ذخیرہ ہے ۔ ٻلپݨ، لڑکپن تے جوانی دے واقعات حقائق تے حادثات دا ہک مال گودام ہوندے ۔ انہاں وچ بزرگ لوکیں دے انہاں تجربات کوں واقعاتی انداز وچ پیش کیتا ویندے ۔ ڳالھ کوں ݙوجھیاں تئیں پُڄاوݨ کیتے مثالاں دا سہارا گھدا ویندے ۔ انہاں کہاݨیاں وچ آوݨ آلی حیاتی کوں بہتر بݨاوݨ تے آخرت واسطے چنگے کم کرݨ دا درس ݙتا ویندے ۔ ایہ کہاݨیاں اساݙے معاشرے دی سُنڄاݨ دا ذریعہ ہن ۔ اَتے نویں نسل کوں تربیت ݙیوݨ تے چنگائی دا رستہ ݙکھاوݨ دا وسیلہ ہِن ۔

پروفیسر دلشاد کلانچوی انہاں کہاݨیاں بارے اپݨی رائے ݙیندے ہوئے آکھیندن جو

’’ایہ لوک کہاݨیاں وݙی عمر دے لوکاں کیتے ہِن ۔ انہاں وچ مذہبی مسئلیاں تے نصیحتاں دیاں ڳالھیں ہوندن ۔ چنڳے سبق ݙیوݨ سانگے پیغمبراں تے بہادراں دیاں داستاناں پیش کیتیاں ویندن۔‘‘

حوالہ

سرائیکی لوک قصیاں دے کردار، مصنف : شہزاد اسد خان لغاری ، ناشر: جھوک پرنٹرز ‘ ملتان