ٻٹہ میراثی
اساݙی وستی دھریجہ نگر دے ڈھیر سارے کردار ہن،ٻٹا میراثی اساݙی وستی دا تاں نہ ہا،پر اکثرا اتھائیں ہوندا ہا،شادی دے نغارے وڄیندا ہا ،اساݙی دکان تے اوندا کھاتہ ہوندا ہا ،اُوں ݙو کھاتے بݨوائے ہن ،ہک تے اپݨا ناں ٻٹا لکھوایا تے ݙوجھے تے کریم بخش ٻوڑا تے بھولا وی ہا تے ٻتڑا وی ۔ ہک کن کپیا ہویا ہس،سپورٹ دی سگریٹ کوں لپوٹ سݙیندا ہا تے کے ٹو کوں کیشو ۔او آکھدا ہا،جݙاں میں لپوٹ گھناں تاں ٻٹے آلے کھاتے اِچ لکھو تے جݙاں کیشو گھناں تاں کلیم بخش آلے کھاتے اِچ لکھو۔وݙے اَئوکھر وندیں آلے فقیر اصل میراثی ہن،یارا فقیر ٻٹے کوں چِڑویندا ہاجو تُوں میراثیں کوں بدنام کیتی ودیں ، تُوں تاں کُٹاݨاں ایں ، نغاریں دی جوڑی چا تے ہر جھاہ تے بھڄ پمدیں ،ٻٹا اکھیندا ہا جو میݙے مقابلے اِچ اپݨے میراثی سݙ آ، میں وانگے جوڑی وڄا ونڄن تاں ہتھ کپوا سٹیساں ۔ہک واری اسیݙیاں عورتاں شادی آلے گھر ویندیاں پیاں ہن ،اساݙے ہک وݙے ٻٹے کوں مندا ݙے تے آکھیا، ہک پاسے مُنہ پھیر ٻہہ،عورتاں لنگھ ونڄن ،ٻٹے اپݨی بتڑی زبان ء ِچ آکھیا رات حویلی اِچ میں نغارہ وڄاتے ساریں کوں جھُمر کھݙائی ءِہُݨ اے بیبیاں بݨ ڳن ۔
ہک ٻیا ڳالھا بھولا ہا ،اُونکوں گودو سݙیندے ہاسے،گودو عبدالکریم دھریجے دا پُتر ہا ، اوندے گھر پیر آیا ٻیٹھا ہا ،ٻے بندے تلے ٻیٹھے ہن گودو پیر نال کھٹ تے تھی ٻیٹھا ،گودو دی ماء ݙٹھا تاں پرے کنوں بُجا ݙے تے آکھیُس ، لخ دی آئی گودو آ،کھٹڑے تے پیر نال جخ مریندا ٻیٹھیں ،پیر آکھیا مریدنی گودو تاں گودو اے ،پر توں گودو وی ماء ایں ۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان