ٻُوڑی کوں کَنیں دی

اَپݨی ماکھی آنگے مِٹھی ماء ٻولی ’’سرائیکی‘‘ دی ہک اَکھاݨ اے ’’لوکیں کوں لوکیں دی ٻوڑی کوں کنیں دی‘‘ پر جݙاں ایہ اَکھاݨ بݨی ہئی اوں ویلھے کݙوکݨیں وہا ڳن۔ ہُݨ ہنائیں لوکیں دی ڳنتری گھٹ تے نہ ہووݨ جوڳی رہ ڳئی اے جنہائیں کوں ٻنہائیں لوکیں دے ݙکھ سُکھ بارے وپرا رہندا ہا ۔ ہر کوئی ‘ ہر کہیں دی تات لہندا ہا تے بے غرض تھی کراہیں اوندا ٻانہہ ٻیلی تھیندا ہا ٻے دی اوکھ کوں اَپݨی اوکھ تے ٻے دے ݙکھ کوں اَپݨا ݙکھ ڄاݨدا ہا ۔ اَڄ کلھ ایں بارے ’’ہر لیکھے‘‘ لیکھا پدھرااے جئیں اَکھیندن جو’’ اَپݨی پوی تے پرائی وِسری‘‘ ۔ ہر ہک کوں اَپݨی پئی ہوئی اے ۔ ہر کوئی اَپݨی غرقی اِچ غرق اے ۔ کہیں کوں کھتی کھنݨ دی ویلھ کائنی ۔ جئیں کوں دنیا جہان دا کوئی کم کار کائنی ۔ ہک لیکھے او وی ویلھا کائنی۔ او اِی اپݨی جھاہ تے ڳنتری اِچ اے۔

جیرھے ویلھے حال ایہ ہووے تے وَل کوئی بندہ ’’اخبار‘’ کڈھݨ دا منڈھ ٻدھے تاں خُشی تھیندی اے اَتے سُدھ سُرت آلے سیاݨیں دی ایں ڳالھ تے وساہ کھاوݨا پمدے جو ڳنتری اِچ گھٹ سہی ۔ اڄاں ایجھے ’’لوک‘‘ ہِن پے جیرھے ٻنہائیں لوکیں بارے سوچیندن ۔ ایہ ڳالھ ایں ڳالھوں وی منݨی پمدی اے جو ایں زمانے اِچ ’’اخبار نویس‘‘ اِی ایجھے لوکیں اِچ ڳݨیجݨ جوڳے ہِن جیرھے لوکیں بارے سوچیندن تے لوکیں بارے لکھدن۔ ایہ ٻی ڳالھ اے جو او سوچݨ تے لکھݨ دا عوضا نہ گھندن ۔ اخبارکڈھݨ ’’وپار‘‘ آنگے ’’وپار‘‘ اے تے ’’اخبار‘‘ اِچ چھپݨ کیتے ݙیہاڑی لکھتاں لکھݨ مزدوری اے یا ایئیں آکھ روزی کماوݨ دا صلہ اے ۔ ’’اخباراں‘‘ ویچݨ آلا وپار وی ہک وݙا وپار اے ۔ ایں وپار اِچ اِی آڑھت اُڳاڑݨ آلے وݙے وݙے آڑھتی ہُݨ دنیا دے ٻنہائیں ملکیں آنگے اسیݙے ملک اِچ اِی وݙیاں ’’اخباراں‘‘ ایئیں ڄاݨ ’’جاگیراں‘‘ ہِن یا وَت کارخانے ہِن اَتے ایہے ’’جاگیرداراں‘‘ تے کارخانے وی ڳیݨویں خاندانیں دی ملکیت ہن ۔ اُنہائیں دے مالک اُنہائیں کوں ’’جاگیریں‘‘ اَتے کارخانیں لیکھے چلیندن اَتے مجال اے جو کہیں ٻے کوں ایں پاسے آوݨ ݙیون یا اَڳیتے وکھ ودھاوݨ ݙیون ۔ نویں اخبار کڈھݨ اَتے او وی ہک ’’تلوچڑٻولی‘‘ اِچ ارشاد امین سئیں جیہے ’’جگرے آلے‘‘ جوانیں دا کم اے ۔ رَب سئیں’’سڄاک‘‘ کوں سوبھ ݙیوے آپاں تاں سچی ڳالھ اے ’’ٻٹ کڑاک‘‘ جوڳے ہیسے جیرھی جیندے تاں ݙیہاڑی لئی رہسئوں۔

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان