ٻر ٻر رابھا
حکایت
بُر بُر رابھا
ہک ہا بُر بُر رابھا ' اوہ پہلے ہک نِکے جہیں شہر وچ راہندا ہا وت وڈے ہک شہر وچ لگا گیا ' اوں بہوں سارے کم کیتے اونکوں چَس نہ آئی ' وت اونکوں مرضی دا ہک کم لَدھا
اوہ بُڈھڑیاں کوں نَپیندا ہا ' اُنہاں کوں کہیں باغ وچ بَنچ تے بِلہیندا ہا ' اَن ڈِٹھی ہک رسی نال اُنہاں کوں بَدھیندا ہا ' بًڈھڑے وت بَنچ اُتوں اُٹھی جو نہ سَگن ہا کِھلدا ہا ' اوہ پکھیاں دے کھنبیں کوں ان ڈِٹھی ہک چیڑھ چِنباڑے ہا ' پکھی وت باغ اندر اُڈ جو نہ سگن ہا کِھلدا ہا ' اوہ مسخریں پچھوں بَھجدا ہا ' جوکریں کوں ڈریندا ہا ' میلے وچ چَڈول کوں پُٹھا گِڑیندا ہا ' سرکس وچ بازی گر گولے اُچھالے ہا ' اوہ پنج وچوں ڈو گولے ان ڈٹھے ہتھیں نال تَلے سَٹواوے ہا کِھلے ہا
مسٹر بُر بُر رابھا گھر وچوں دھمی نال نکلے ہا ' بہوں جلدی اونکوں بال تریمتیں بُڈھڑے نقلی جوکر شاعر سیاسی ورکر ڈِس کتھاہیں پوون ہا ' اوندی چَس بَنڑ وَنجے ہا۔ رفعت عباس۔