ٹورنٹو وچ ڈی جی خان

ٹورونٹو ءچ ڈی جی خان

شہزاد عرفان

آہدن جو زرعی سماج دی ڈھیر ساری خوبیاں ءچوں سب تو اُتم تے ودھیک سُنْھپ لوکاں دا آپسی مضبوط ڳانڈھا ہے۔ ہک ویہڑے ءچ لوکاں دا آپسی رشتہ، گھر دا وستی نال تے وستی دا شہراں نال ہک تندیر جُڑت دراصل وسیبی سنجانْ آ بنْدی ءے۔ اویں تاں پورا سرائیکی وسیب دا تانْا پیٹا زریعتی وسوں نال وُنْا پئے پر ہر پاسے دا آپوآپنْا سنْھپ تے چس ءے جیندا کوئی حد ٻنا کوئی نئیں۔ دیرہ کیفے سرائیکی کنیں گھن قائداعظم یونیورسٹی دے جھرنے تئیں حال حویلے، بٹاں خچاں، قہقے ، لانتاں ملامتاں، دانشوریاں، چھیٹے سگرٹاں سبھے گالھیں چیتے رکھ مارکہ اج کوئی کتھ تے کوئی کتھ ۔ پر سنگت جتھ جو لبھ پو وے مارکہ اُتھائیں ٻِکے پئین۔ جی ہا۔۔۔۔۔ کل خالد بزدار کنیں ہک شاندار دعوت دا اہتمام ہا جیندے ءچ روایتی دسترخوان اُتے لالہ اسماعیل لغاری دی ٻٹاں ہن جو مارکہ کُکھاں نیوائی پئے ہن ـ اصلوں لگدا نا ہا جو ست سمندروں پار کنیڈا ءچ بیٹھوں۔ دیرے دے سنگتی کٹھے ہن تے اُوہا چس ہئی جیکوں چھوڑے ہک مُد ٹپ گئی ہائی۔ لگدا ہئی جو اوہو ویہلا ول پئے ۔ دیرے آلاں دی اے خوبی جو "ہر دم مست تے ہردم ساوے" وسیب دے باقی مزاج تو اصلوں وکھری ءِ۔ جتھ ونج وسدن اُتھائیں دیرہ غازی خان ۔ اپنْا ڈی جی خان نال چاتی ودِن ۔ آپسی جُڑت دی سنگت دا اے قیمتی رشتہ صرف دیرے آلاں ءچ لبھدے۔ شہزاد عرفان