ٹانگے

اسیݙی وستی دھریجہ نگر ءِچ ݙو ترائے ٹانگے ہوندے ہَن ،امیر بخش ، جند وݙہ تے غلام حسین کوچواݨ ہوندے ہَن ۔سڑکاں  خراب ہوندیاں ہَن ،بس دیر نال اَمدی ہئی ، لوک مجبوری کنوں  ٹانگے تے چڑھدے ہَن ۔ گھوڑی یا گھوڑا تھک ہار تے شام کوں  گھر آوے ہا تاں  تِکھے تِکھے ٹُرݨ پئے ویندا ہا ، کوچواݨ واڳ چھک تے اَکھیندا ہا پچھوں  تاں  مر مر تے اَئیں  گھر ونڄݨ دی تیکوں  اُٻالھ اے ۔گھوڑا جویندے ہَن تاں  پہلے اَڑی کریندا ہا ،کوچواݨ ہتھ پھریندا ہا ،شام کوں  کُنالی ءِچ داݨہ سٹن ہا تاں  گھوڑا ہنڑکدا ہا، کوچواݨ اَکھیندا ہا ، داݨہ ہِݨ ہِݨ ، لغام نہ ہِݨ ہِݨ ،داݨہ تے تلہ کھا گھنے ہا تاں  وَل کوچواݨ خرخرا مریندا ہا ۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان