ویندی تاں اُون٘ویں پئی

سرائیکی نعت شریف

ویندی تاں اُویں پئی ہیں بادِصباء مدینے

ݙُکھیاں دا حال چائی ون٘ڄ ݙیویں سُݨا مدینے

اللہ دی بارگاہ وچ ہر جاہ توں پُجدی ہے پر

مقبول ہے او جیہڑی منگو دعا مدینے

آؤ گنہگارو بخشش کرا گھنو ہا

جھولی نہویجے خالی ویندی ہے بھر مدینے

میݙی مرض طبیبو کیویں بھلا ہٹیسو

دل تاں ہے میݙے سینے دل دی دوا مدینے

لکھاں پڑھو نمازاں پر او سرُور کائے نئیں

کوئی ہک تاں تھی ون٘ڄے ہا سجدہ ادا مدینے

کافر کوں رکھو سُکڑیں، مومن دا تاں ایمان ہے

موجود چا پجا ہے، ملدے خدا مدینے

ہر دید والے کیتے زندگی دے کل مقاصد

بے دید کوں ݙساؤ، ملدا ہے کیا مدینے

زندگی رہئی تاں آخر ملسوں نماشاں ویلے

مکے عشاء ہوسی پڑھسوں فجر مدینے

الحمدللہ شاکر ٻہوں ہے خدا دا ݙِتڑا

تن دی فکر تاں کائے نئیں من دی غذا مدینے

کلام شاکر شجاع آبادی صاحب