ویلݨاں
جیویں کھوہ نی وِسردا ایویں ویلݨاں وی کݙاہیں نہ وِسرسے ، توݨیں جو اساݙے علاقے ء ِچ ڳنے آلی مِل ہئی پر اسیݙی وستی دھریجہ نگر ء ِ چ ویلݨے ٻہوں ہوندے ہن، کہیں ویلے سڑک آلی زمین تے کہیں ویلے گھر آلے ایکڑ ء چ ݙاݙا سئیں ویلݨاں لیندے ہن ۔ ہک پاسے ویلݨاں ہوندا ہئی ٻے پاسے پت پکدی ہئی ، نال رابیل دے ٻتھے ہوندے ہن ۔جیویں لوک کھوہ تے کٹھے تھیندے ہن ایویں ویلݨیں تے وی کٹھے تھیندے ہن، کھوہ تے وی ݙاند کھوپے ٻدھ تے جوویندے ہن ،ویلݨیں تے وی کھوپے ٻدھ تے جوتا ویندا ہا ،ڳنے دی پہلے رائو کڈھیندی ہئی ولا وݙے کنڑھا ء ِچ سٹ تے اُونکوں پکا یا ویندا ہا ،رنگ کاٹ تے ٻیاں شئیں سٹیندے ہن،ڳڑ بنڑدا ہا ،شکر دے دیسی کھنڈ وی بنڑیندے ہن،سوکھڑی ݙیوݨ کیتے انج پت پکدی ہئی ، دیسی گھیو تے میوے مغز سٹیندے ہن،فصلاں تاں ڈھیر ہن پر ڳنے دی شان تے دھڄ اپݨی اے ، ویلݨیں دی پت ڳنے دی کھوری تے ویلݨیں دے چورے نال پکدی ہئی ،ڈھور ڈھانڈے آلے ڳنے دی چھیلی چھلیندے ہن پاند چا ویندے ہن ڳنا مالک دا ہوندا ہا، کاشتکار ویلݨیں فصل آلی جھاہ تے لیندے ہن تے نال ڳنڈھے ٻدھ تے ویلݨیں تے پُڄیندے ہن ، ڳڑ لوک اُتھائیں وی گھن ویندے ہن ،زیادہ غلہ منڈی خانپور ویندا ہا ، وݙی منڈی خان پور دی ہئی پر وپاری اکھیندے ہن جو لیاقت پور منڈی تے ڳڑ دا اَگھ چنڳا ملدے، گُڑ دی بھیلی کوں پیشی وی سݙیندے ہن، تتی پیشی کھاوݨ دا اپݨا سواد ہوندا ہا ، کئی جتنا کھاوے کہیں کوں نہ جھلیندے ہن، میݙیاں ڳالھیں کجھ اُتے تلے وی ہوسن ،ڈھیر سارے شئیں دا میکوں علم کائنی میݙی اے تحریر تے وݙا علمی مقالہ وی کائنی ، جیڑھی ڳال میکوں یاد اَمدی ہے ، بے ترتیب سہی پر لکھی وینداں کیوں جو لکھی ہوئی شئے کم اَمدی ہے۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان