ویل
اکرم دی ۱۹۸۴ء وچ نوکری تھئی۔ ڈھیر ساری تنخواہ تے جیپ دی سہولت اونکوں ملی۔اکرم ہک غریب گھر دا بندہ ہئی۔ مگر اونکوں امیر بندیاں دے نال امیر بݨ تے راہݨ دا ݙاں آندا ہا۔ اُوندے کجھ دوست علی پور وچ رہندے ہن۔ پپو شاہ ، ببی شاہ ، منیر حسین شاہ تے ٻئے ڈھیر سارے اوندے قریبی دوست بݨ ڳئے۔ ݙوجھے تریجھے ملاقات تھیندی ہئی تے ایہ سارے دوست رَل مل تے کہیں نہ کہیں جاہ تے اچھے ٹُکر کھاوݨ دا اَہر وی کریندے ہن۔ علی پور دے دوستیں کوں ایں چنگے خرچ باز نوجوان دی یار ی ٻہوں پسند ہئی۔ اُوں ویلے جیپ نے اوندی شخصیت وچ کافی ودھارا کیتا ہویا ہا۔ کجھ عرصے بعد ببی شاہ دی شادی ڳݨیج پئی۔ دوستیں پروگرام بݨایا جو علی پور دی ریت روایت ہے شادی تے کوئی موسیقی دا شغل میلا ضرور ہوندے۔ علی پور دے سید ، کُھلنگ، لشاری، پنوہیں، گوپانگ، قاضی ،جتوئی تے ٻئے ڈھیر سارے نوجوان شادئییں کوں سُہیندے ہَن۔ ببی شاہ دی شادی دا انتظام وی ایں مزاج دے مطابق کیتا ڳیا۔ موسیقی واسطے ملتان اِچوں ہک چھُوہر سݙوائی ڳئی ۔
پپو شاہ اپݨے دوست اکرم کوں آکھیا جو موسیقی داپروگرام رات کوں ہک وڄے توں بعد رکھیا ویسی تاں جو ڈھیر سارے رَش کنوں بچیا ونڄے۔موسیقی دا انتظام رکھیا وی کہیں خفیہ جاء تے ویسی جِتھاں صرف سَو یا سَو توں گھٹ بندے ہوسن۔ویلاں ٹِکا تے ݙتیاں ویسن تے اکرم میاں تساں تیاری کر تے آوائے۔اکرم آکھیا: ٹھیک ہے۔
حالی شادی اچوں ہفتہ راہندہ ہا ۔ اکرم اپݨی تنخواہ جیڑھی جو اُوں ویلے ترئے ہزار روپے ہئی دی ہک خاص ونڈ رکھیندا ہا۔ جیندے وچ اُوندے آپݨے ذاتی ڈرائیوردی تنخواہ مہینے دا ترئے ٹائم دا ٹُکر مکان دا کرایہ تے کجھ ماہانہ بچت شامل ہئی ۔ شادی تے موسیقی تے کم از کم پندھراں ویہہ ہزار روپے دا خرچہ ہا۔ اکرم کوں پتہ ہا جو اُو ایں شادی کوں سُہا نَئیںسڳدا۔ مگر علی پور دے دوست اُونکوں کݙاہیں غریب نہ ڄاݨدے ہَن۔ اُنہاں کوں پتہ ہا جو اے جوان امیر ہے تے ایہ وݙے فنکشن وچ ٻہہ سڳدے۔ اکرم سوچا بہتر تاں ایہہ ہے جو اُو شادی چُکا ݙیوے۔ جیڑھا جو ٻہوں مشکل ہا۔ جو اگر شادی چُک پئی تاں اے گِلہ سارا سال دا بݨسی۔ ݙوجھی صورت شادی وچ حاضری دی ہئی ۔ تے ایہ حاضری اُوندی برداشت توں ٻاہر ہئی۔ ایں کشمکش دے وچ اکرم کنوں کوئی فیصلہ نہ تھی سڳیا جو شادی تے ونڄے یا نہ ونڄے۔ شادی وچو ں ہک ݙینہہ رہ ڳیا۔ اکرم کوں خیال آیا جو شادی تاں ضرور بھُگتاوݨی پوسی۔ رہی ڳالھ ویہہ پنجویں ہزار دے ویلیں دی۔ تاں اُوندا کوئی حل کڈھیا ونڄے۔ آخر اوندے ذہن اِچ ہک غیرت تے ہک ترکیب آئی۔غیرت اے جو شادی دا ویلیں دے مقابلہ جیتݨے ،کیوں جو پپو شاہ وݙے ماݨ نال سݙیا ہا۔ ترکیب ایہہ جو مہینے دا خرچ خراب نہ تھیوے۔
شادی دا ݙینہہ شرو ع تھی ڳیا۔ مغرب دے قریب قریب کوئی ہزار بندہ شادی تے آچُکیا ہوسی۔ ہر پاسے مہمانیں دے کھٹڑے نظر آندے پئے ہن ۔ ہک ایکڑ دے وچ ٻیٹھے مہمانیں کوں اینجھی ترتیب نال روٹی کھوائی ڳئی جو دیسی مُرغ پیس، ٻکرے دا نمکین گوشت ،اعلیٰ پلائو، خوشبو دار زردہ کھُٹݨ وچ نہ آیا۔ سارے مہمان خوش ہَن۔ روٹی کھویج ڳئی۔ ݙاہ وڄے تک مہمانیں کنوں شادی والے فارغ تھی ڳئے۔ اُوندے بعد مہمانیں کوں بستر ے ݙے سُملا ݙتا ڳیا۔ موسیقی دا انتظام شادی والی جاہ وستی بندے شاہ توں چار میل پرے علی پور شہر وچ ہا۔
ہک اعلیٰ کوٹھی دے ڈرائنگ روم اِچ سرخ ٻوٹے دار قالین وِچھیا ہویا ہا۔ سامݨے ڈانس واسطے تخت پوش وِچھائے ڳئے ہَن۔ جیندے اُتے رنگ برنگے قالین وِچھے پئے ہَن۔ ہال دے وچ چمکدار کاغذی پھول، سہرے، گلاب دیاں ٹِکیاںتے لمبی لڑیاں بجلی والی مرچاںتے وݙے روشنی والے بلب چھت نال لڑکیے کھڑے ہن۔ ٻہوں مہنگا سپرے سینٹ چھڑکیا ڳیا ہا۔ جیندے نال ہال ٻہوں معطر تھی ڳیا۔ سامݨے اسٹیج تے ٻہوں اعلیٰ قسم دا رنگین چمکدار پھُلدار ’’خوش آمدید ‘‘لکھیا ہویا ہا۔ اسٹیج تے ہک پاسوں ہک اعلیٰ سُریلا اُدھیر عمر گَویّا ہارمونیم رکھی ٻیٹھا ہا تے ݙوجھی طرفوں ݙو بندے طبلے تے ڈھولک سڄئی ٻیٹھے ہَن۔ اکرم اپݨی جیپ تے پپو شاہ تے کجھ ٻئے دوستیں نال ایں کوٹھی تے پُڄ ڳیا۔ کوٹھی دے ٻاہروں ڈھیر ساریاں کاراں تے جیپاں کھڑیا ں ہَن۔ جنہاں دے گن مین بندوقاں چاتی ٻاہروں کھڑے ہَن۔ اکرم پپو شاہ تے ٻئے دوست کٹھے رَل تے کوٹھی دے مین گیٹ توں اندر داخل تھئے تاں ہال دے اندروں ہک اعلیٰ گیت دی دُھن سُݨیندی پئی ہئی ۔ڈرائنگ روم کھولیا تاں اندروں ڈھیر سارے نوجوان اپݨی پوری جوانی تے آب تاب نال ٻیٹھے ہَن۔ایہ سارے زمیندار تے کجھ وݙے افسر ہَن۔ ہک سوہݨا جیاں اَدھا دائرہ بݨیا ہویا ہئی ۔ ہر بندے دے اڳوں ہک ہک روپے والے نوٹیں دیاں دڳیاں لاتھیاں ہَن۔ کہیں دے اڳوں پنجاہ ہزا ر تے کہیں دے اڳوں لکھ کنوں وی زیادہ ۔ڈھیر سارے مہمانیں دی اَکھیں نشیلیاں نظر آندیاں پیاں ہن۔ پاݨی دے گلاس اتنے نظر آندے پئے ہن جیویں جو انہاں ساریاں کوں تریہہ ڈھیر لڳدی ہئی ۔ اکرم پپو شاہ تے ٻنہیں دوستیں کوں ݙیکھ تے ڈھیر سارے مہمان اُٹھی تے ملیے۔ اکرم دا سفید سوٹ تے ڳل اِچ سُرخ مفلر اوندی شخصیت وچ اضافہ کیتی کھڑا ہا۔ اکرم تے پپو شاہ کوں پہلی لین دے وچ ٻلہا ݙتا ڳیا۔ اُوندے بعد اسٹیج تے ٻیٹھے فنکاریں کوں موسیقی جاری کرݨ دا اشارہ کیتا ڳیا۔ ہارمونیم تے ٻیٹھے بندے اینجھی تیز لَے شروع کیتی تے نال طبلے والے کمال دی سنگت شروع کیتی تاں پورا ہال موسیقی دی سُر سنگت اِچ کھُٻ ڳیا۔ بندے جھُمݨ تے جھوٹݨ لڳ پئے۔ایں تیز موسیقی دے درمیان دے وچ اللہ پاک دی بݨی ہوئی ہک تصویر جیڑھی جو ہلکے گلابی رنگ دے ساٹݨ دے کپڑیاں وچ ہئی، پردے دے پچھوں ہک اُوتھر والی کار تڑ تڑ کریندی اسٹیج تے آڳئی۔ ڈانس دے نال اُوں زمین تے اسمان کوں کٹھا کر ݙتا۔ شکل و صورت اوندی کہیں حورکنوں گھٹ نہ ہئی۔ خدوخال اینجھے سوہݨے جو اوندی کتھاہیں مثال وی ݙتی ونڄ سڳیندی ہئی۔ محمد اکرم دی اپݨی ہک ترکیب ہئی اُوں جیب اِچ ہتھ ماریا تے سڄے ہتھ اِچ سَو دا نوٹ سبھ توں پہلے کڈھیا۔ اسٹیج تے فنکارہ جیویں سَو دے نوٹ کوں ݙٹھا تاں اُو سِدھا اکرم دی طرف لہراں پیندی ہوئی آ گئی۔ اکرم اُوں فنکارہ تے توجہ ݙتے بغیر اپݨا مونہہ پپو شاہ ݙو کیتی رکھیا۔ فنکارہ سَو دے نوٹ کوں ہتھ پاتا تاں اکرم فوراً نوٹ چھوڑ ݙتا۔ فنکارہ دل وچ حیران ضروری تھئی ہوسی جو ایہ بندہ سَو ݙیندے تے ݙیدھا نئیں۔ اکرم وَل جلدی نال ݙوجھا نوٹ سَو والا سڄے ہتھ پا تے ہتھ ہوا وِچ بلند کیتا۔ فنکارہ وَت لہراں کھاندی ہوئی ݙوجھا نوٹ اَن پکڑیا۔ ا کرم توجہ ݙتے بغیر سَو دا نوٹ چھوڑ ݙتا۔ وَل تریجھا نوٹ کڈھیا۔ سَو دا نوٹ جیویں ہوا وچ بلند تھیا ، ہال دے وچ حال حال پئے ڳئی جو ایہہ کیا ہے۔کئی بندے اُٹھی تے زور نال اَلاوݨ شروع کر ݙتا جو اَساں ہک ہک روپیہ ݙے تے ساری رات ڳاوݨ سݨݨن تے سویرے پنج ونڄے توݨی ویلاں ݙیوݨ تے سَو روپے دی ویل ݙیوݨ والا بندہ کون ہے اینکوں ہٹکو۔نَئیں تاں اَساں گھر ویندوں، اساں ایہہ تماشہ نی ݙیکھ سڳدے۔ کجھ دوستیں پپو شاہ کوں ہال دی چُنڈھ وچ گھِن ڳئے تے اُتھاں کوئی ڳالھ کیتی۔ موسیقی بند تھی ڳئی ۔ پپو شاہ فوراً آیا تے اکرم دے مونڈھے تے ہتھ رکھ تے اکرم دے کن اِچ ڳالھ کیتی ، آکھیُس اکرم صحیب تُساں ہک ہک روپیہ ݙیو۔ سَو سَو نہ ݙیو۔ اکرم جواب ݙتا ’’جو میں تاں چاتی ہی سارے سَو سَو والے آیاںیا میکوں سَو سَو ݙیوݨ ݙیو یا میکوں ویلاں ݙیوݨ کنوں ہٹکو چا۔ پپو شاہ اکرم کوں ویلا ں ݙیوݨ توں ہٹک ݙتا تے موسیقی سویرے پنج وڄے تک جاری رہی۔
٭٭٭
حوالہ
[لکھو | ماخذ وچ تبدیلی کرو]کتاب: وتر ساخ (سرائیکی کہاݨیاں) ، مصنف : عبداللطیف بھٹی، ناشر: جھوک پبلشرز ،ملتان