وکیپیڈیا تے کلام فرید
اَللّٰه تعالیٰ دے فضل و کرم نال 6 فروری 2025 توں اساں ہک کَم دا آغاز کیتے جو سرائیکی دے سبھ توں عظیم شاعر حضرت خواجہ غلام فریدؒ دے کلام کوں سرائیکی وکیپیڈیا تے گھن تے آیا ونڄے تاں جو اُنہاں دا سنیہا زیادہ توں زیادہ لوکاں تک پُڄ سڳے تے آپ دی شاعری وچ دلچسپی رکھݨ آلے لوکاں کوں آپ دا کلام سمجھݨ وچ آسانی تھیوے۔ اِنہاں توں علاوہ سرائیکی وکیپیڈیا اَتے سرائیکی زبان دی ترقی سانگے وی ایہ کَم ٻہوں زیادہ اَہم ہے۔
اِیہ کَم شروع کرݨ کیتے ٻہوں سارے لوکاں نے اَساݙی حوصلہ افزائی کیتی جِنہاں وچ سئیں پرویز قادر ، سئیں مشتاق ، سئیں جام صدیق مڑل اَتے سئیں مُجاہد جتوئی شامل ہِن اَتے ٻہوں سارے اَساݙی مدد وی کریندے پین۔ اِیں کَم کیتے اساں زیادہ تر مدد سئیں مجاہد جتوئی دی کتاب دیوان فرید بالتحقیق توں گھندے پیوں(اُنہاں دی اجازت نال)
اِیں کَم وچ ترئے توں چار شیئاں شامل کیتیاں ڳن:
1- کافی دے الفاظ اَتے مصرعاں دی تعداد تاں جو کوئی بندہ کافی وچ لفظاں اَتے مصرعاں دی تعداد گھٹا ودھا نہ سڳے۔ اِیں کَم کیتے سئیں مُجاہد جتوئی دی کتاب دیوان فرید بالتحقیق توں مدد گھدی ویندی پئی ہے۔
2- کافی درست اِملاء اَتے اعراب دے نال۔ ایں کم کیتے وی سئیں مجاہد جتوئی دی کتاب دیوان فرید بالتحقیق اَتے قیس فریدی توں مدد گھدی ویندی پئی ہے۔
3-اوکھے لفظاں دے معانی و تلفظ۔ ایں کَم کیتے دیوان فرید بالتحقیق اَتے سرائیکی لُغتاں جیویں شوکت اللغات ہے توں مدد گھدی ویندی پئی ہے۔
4-کلام دی مختصر وضاحت۔ ایہ ایں سلسلے دا سب توں اَوکھا کَم ہے اَساں ارادہ کیتے کہ خواجہ سئیں دے کلام دی سوکھی سرائیکی وچ مختصر وضاحت کروں تاں جو اُوندا معنی واضح تھی ونڄے یاد رہوے کہ ایندے وچ تشریح کائنی کیتی ڳئی بلکہ صرف سوکھے انداز وچ معنی واضح کیتا ڳئے۔
5-کافی دا نِتارا۔ نتارا مطلب خلاصہ اساں ایہ ارادہ کیتے جو آخر وچ کافی دا مختصر خلاصہ وی پیش کروں تاں جو معنی سمجھݨ وچ مزید آسانی تھیوے۔
ایہ ہک طویل کَم ہے ہالی ایندے اُتے کَم جاری ہے اگر تساں کہیں کافی کوں سمجھݨ چاہوو تاں وکیپیڈیا اُتے ڳولݨ شیشی وچ کہیں وی کافی دا پہلا مصرع لِکھو اگر اوہ کافی مکمل تھی ڳئی ہوسے تاں تُہاݙے سامنے آ ویسے۔
ایہ ہک اوکھا تے طویل کَم ہے ایندے وچ غلطیاں تھی سڳدیاں ہِن۔ اہلِ علم حضرات کنوں ارداس ہے جو اوہ اگر کوئی غلطی ݙیکھن یا کَم کوں ودھاوݨ چاہون تاں اوندے وچ ترمیم کر ݙیون۔شکریہ۔ (تحریر: حافظ عُمر ونجارہ)