وَاہ وَاہ سوہݨا پیر آ!

شالا چر جُڳ جیون ‘ سلامت رَہن ‘ اَپݨے پیر پگاڑا سئیں ہِن وَݙے روݨقی بندے ۔ نِت نویں کنوں نویں ڳالھ کڈھ مَریندن ۔ اُنہیں دیاں ڳالھیںاخبار اِچ چھپدِین ویندیاں تے روݨقاں لڳ ویندین‘ لوک پڑھ پڑھ تے چَس چیندِن ۔ سَواد گھندِن ‘ کِھلدن ہَسدِن ‘ پَر وَل کُھتی کھنݨ پئے ویندن ۔ او ہِیں کاݨ جو ایہے ڳالھیں چھڑیاں کِھل ٹوک آلیاں ڳالھیں کائنی ہوندیاں ۔ اِنہیں ڳالھیں اِچ وی کئی ڳالھیں ہوندین‘ جنہیں بارے بندے کوں زوریں رِیت سوچݨا پَمدے ۔ اخباراں پڑھݨ آلے اساں جیہے ہماتڑ تماتڑ عام بندے تاں ریہے ہک پاسے وݙیں وݙیںاخباریں دے دفتریں اِچ ٻیٹھے ہوئے وَݙے وَݙے اخباری لکھاری وی اَپݨے مَتھے تے ہَتھ رَکھ تے پیر پگاڑا سئیں دی ڳالھ مُہاڑ بارے اَپݨی اَپݨی اخبار اِچ چھپی ہوئی رپورٹ پڑھدِن ۔ پڑھ کراہیں پہلے کِھلدِن ‘ وَل سوچیندن اَتے سوچ سوچ تے کجھ نہ کجھ اُوں بارے لِکھݨ کیتے مجبور تھی ویندن‘ ایہے لکھتاں پڑھݨ آلے کوں سوچݨ تے مجبور کریندِین ۔ او ہِیں ڳالھوں جو پیر سئیں کِھلدیں کِھلدیں وَݙے سِݨہپ دیاں ڳالھیں کریندن ۔ سُدھ سُرت اَتے سِیݨہپ آلیں لِکھیں دی جھاہ تاں اَپݨی ہوندی اے ‘ کِھل ٹوک اَتے ٻٹ کڑاک آلیاں لکھتاں لکھݨ آلیں دی تاں اُونویں موج تھی ویندی اے‘ او اِی اَسّاں آنگے پیر سئیں دیاں ڳالھیں نقل کر تے ݙوں چار ڳالھیں آپوں رَلا تے واندے تھی ٻہندن اَتے پیر سئیں دے دَرحق دُعائیں کریندن۔ جیئیں اَڄ اساں مُنڈھ ٻدھے!

اخباریں اِچ پیر سئیں دی جیرھی ہُݨ ڳالھ مُہاڑ اَتے ’’ٻٹ کڑاک‘‘ چھپی اے اوندے موجب اُنہیں آکھیے جو ہُݨ جیرھی حکومت ہے او اَݨ بھانوݨی حکومت اے ‘ اَتے لوکیں کوں مُنڈھ لاء کنوں نِیں بَھمدی ! پِیر سئیں دے آکھݨ موجب پہلے ’’بیلٹ‘‘ (پرچی) آلا مارشل لاء اَئے وَل الیکشن دے نتیجے بَدلیے ڳے ۔ اوں کنوں بعد بے ایمانی تے ‘ بے ایمانی تھی ۔ اُنہیں آکھیا جو اُنہیں حاکمیں دے وعدے کجھ ہَن تے کیتا کجھ ہینے‘ اُنہیں آکھیا جو 5؍ فروری کوں ’’سرکاری‘‘ تے 10فروری کوں عوامی ہڑتال تھیسے ۔ وَنڑنج وَپار اونویں چَٹ تھیا پے ۔ تیل اُونویں مہانگا تھی ڳے ‘ ٻال اُونویں پڑھݨ کائنی ویندے ۔ جیرھا پہلے جھیڑے جھٹی گھتویندا رَہ ڳے تے بانسیں کوں ٻانہیں ݙیندا رَہ ڳے ‘ اُوں ہُݨ کلہیں ٻہہ تے آپ ڳݨ مُنج کرݨی ایں جو او سِدھے دَڳ تے کیئیں وَلّے! جیندے نال بھاہ نہ بھڑکے اُوہا چُو نئیں سورَݨ دا فَیدہ ؟ اُنہیں کنوں پُچھیونے جو حالات دَا اُٹھ کیرھے پاسے ٻہسے؟ اُنہیں وَلدی ݙتی جو پہلے ایہ پتہ کرݨا پوسے جو ’’اُٹھ‘‘ ہے یا ’’ݙاچی‘‘ اے ؟ پِیر سئیں آکھیا جو اَپݨے مُلک اِچ گڑ بڑ گھٹالے بارے کُجھ آکھیا تاں پہلے اُنہیں کوں ’’اندر‘‘ وَنڄݨاں پوسے تے وَل نوابزادہ نصراللہ خان کوں ‘اُنہیں آکھیا جو ہُݨ ݙیکھݨا ایہ ہے جو جیرھا دڳ اُنہیں دے یار نواب زادہ نصراللہ خان گھدے ۔ اللہ سئیں اُنہیں کوں سوگھا کرویندے یا سوگھا کراوݨ آلیں کوں سوگھا کرویندے اُنہیں آکھیا جو او کھاوݨ پیوݨ تے تھولی گھݨی گڑ بَڑ تائیں تاں نواب زادہ صاحب تاں ’’گھٹالے‘‘ اَتے گھوٹے آلے دَڳ تے ٹُر پِن ‘ پیر سئیں ایہے ڳالھیں نواب زادہ نصراللہ خان دے لہور آلے دیرے تے اخبار آلیں نال ڳالھ مُہاڑ کریندیں ہوئیں کیتیاںاُنہیں اَپݨے وعدے موجب نواب زادہ صاحب کوں سگاریں دے ݙوں ݙٻے وی سوکھڑی دے طور تے ݙتے۔

جمعۃ المبارک 8فروری 1991ء

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان