ووٹ کینکوں ݙتنسِے؟

احپ الیکشنیں آلا ناٹک اِی واہ جو ناٹک اے۔ ݙوں مہینے تھی ڳن مُکݨ اِچ نی پیا اَمدا ۔ ہک لیکھے تاں مُک ڳے جواساں جیہے ہماتڑ تماتڑ بندے عام لوکیں جنہیں کوں حاکم تے وݙے لوک عوام سݙیندن ۔ پچھلے مہینے دی اٹھاوی تریخ کوں پرچی پا تے اَپݨا پاند چُھڑا کھڑے ہَن ۔ ڄٹ ڄاݨے تے وِڄوں ڄاݨے ۔ ناٹک دا پہلا ’’پاٹ‘‘ ہوں ݙینھ مُک ڳیا ہا ۔ کئی مُٹھاں گُھٹی پِے ہَن ۔ تلیاں ملویندے پے ہَن ۔ ݙندوݨ پے پے ہانے ۔ تے کئی وَت جُھمراں پئی وَدے ہَن ۔ مٹھائیاں وَدّے ونڈیندے ہَن ۔ بھاکلاں تے ڳلکڑیاں وَدّے پیندے ہَن۔ تھورے وَدّے منیندے ہَن ۔ ’’مبارخاں‘خیر مبارخاں‘ لکھ لکھ مبارخاں‘ تسیکوں مبارخاں‘‘ لئی وَدے ہَن ۔ الیکشن کنوں پہلے ایہ ’’ٻنہائیں‘‘ کوں چئی وَدّے یہَن ۔ خُشامتاں ‘ چاپلوسیاںتے سیوا ٹنہوال وَدے کریندے ہَن ۔ جیرھے ڄیہاڑے دے ایہ آپ چُنڑیج تے ’’ممبر‘‘ بݨئین ’’ٻے‘‘ ہِنائیں کوں چئی وَدِن ۔ اِنہائیں دیاں خُشامتاں ‘ چاپلوسیاں تے سیوا ٹنہوال پئی تھیندی اے۔ ’’پجاروئیں‘‘ تے موٹر کاریں تے چڑھیئے وَدِن ۔ اُلخیں مُلخیں دیاں سیراں وَدّے کریندن ۔ خرچے ٻنہائیں دے چوݨ ہینائیں دی ۔ ہِیں مہینے دی اَٹھاوی تئیں انہائیں دی رات اے جھوٹے جھل گھنن ۔ نویں دے نوں ڄیہاڑے پِچھے وَدی لِݙ ٻہارے۔ چیئرمین تاں چُنڑیجݨ ݙیو ۔ وَل انہائیں کوں نونہوں تے اِی کہیں نِھیں لِکھݨاں۔ اَپݨے آنے آلے ٹِکاݨے تے وَل اَوسِن ۔ جئیں ایہ ووٹ گھنݨ دے بعد ووٹریں ݙے مونہہ نی کریندے ۔اینویں ووٹ گھن گھنݨ دے بعد چیئرمین اِنہائیں کوں سِدھا مونہہ نی ݙیوݨا۔

خیر سئیں ! ایہ ڳالھیں تاں رَہ ڳیاں اَپݨی جھاہ تے الیکشن آلے ہِیں ناٹک آلی ایہ ڳالھ وݙی سوادی تے چسولی ہئی جو الیکشن لڑݨ آلے ’’امیندوار ‘‘ بندے اِی کائناں ریہے ہَن ۔ اساں سبھنائیں اَپݨے ووٹ بھلا بندیں کوں ݙتے ہَن؟۔ ذہن تے زور ݙے تے یاد کرو ہاں۔ چیتا جھاہ تے کر کراہیں امیندواروں دے ’’نشان‘‘ تے دید بھنوائو ہاں ۔ بندے دا تاں کتھائیں ناں اِی کائناں ہا ۔ ’’کرسی‘ کُہاڑا‘ لغڑ‘ تختی ‘ سلیٹ ‘ ریڈیو ‘ ٹی وی ‘ ٹیلی ویژن‘ کار ‘ بلب ‘ رکشہ ‘ سکوٹر ‘ ہیلی کاپٹر ‘ ٹریکٹر ‘ ٹرک ‘ ٹانگہ ‘ ݙاندیں آلی گاݙی ‘ کھوہ ‘ ڈھینڈا ‘ کہی‘ کانڈی ‘ قینچی ‘’’چاقو‘ آری ‘ رندا ‘ چرکھا ‘ پوڑ‘ پنسل قلم تے مسواݨی ‘ کنگھی ‘ کوٹ ‘ صدری ‘ لالٹین ‘ ݙیوا ‘ موم بتی ‘ ماچس ‘ ریل آلا کالا انجݨ ‘ پُل ‘ پکھا ‘ کتاب ‘ ٹوپی ‘ پٹکا ‘ میز ‘ جندرا ‘ سوٹ کیس ‘ اِستری ‘ عینک ‘ گھڑی ‘ ٹَلی ‘ ٻالٹی ‘ وَݨ ‘ مندری ‘ سیٹی ‘ سلائی آلی مشین ‘ بُرش ‘ بلب ‘ کرکٹ آلا بلا ‘ ہاکی‘ چانہہ داݨی ‘ کوپ ‘ دِلا ‘ جڳ ‘ گلاس ‘ پیالہ ‘ اَستاوا ‘ بدناں تے اللہ ڄاݨے ٻیا کیا کیا؟۔

سوچو ہاں ! اساں تُساں‘ آپاں سبھنائیں ’’ووٹ‘‘ کینکوں ݙتن؟ بندے دا تاں ناں کیناں ریہا ہا ۔ اَدھ اِچ ۔ او تاں آپ وَدّے اَکھیندے ہَن ’’حُقے‘‘ کوں ووٹ ݙیو ۔ ’’ٻیڑی‘‘ کوں ووٹ ݙیو ۔ ’’کھٹڑے‘‘ کوں ووٹ ݙیو ۔ ’’بسترے‘‘ کوں ووٹ ݙیو ۔ ’’ٹانگے‘‘ کوں ووٹ ݙیو ۔ اَستاوے‘‘ کوں ووٹ ݙیو ۔ الیکشن آلے ناٹک دے ہِیں اُتلے پاٹ دے مُکݨ تے جیڑھے ویلھے ڳنتری تھئی ہئی تاں ہوں ویلھے وی ایہا ڳݨ مُنڄ تھئی ہئی ۔ ایہو لیکھا چوکھا تھیا ہا جو ’’دِلے‘‘ کوں کِتی ووٹ ملیئے ہَن؟ تے ’’ڈھکݨی‘‘ چوکھے ووٹ گھن ڳئی اے؟۔’’قینچی‘‘ کوں چوکھے ووٹ مِلن؟ تے اُسترا‘‘ کِتی ووٹ گھن ڳے؟ … حاکمیں کیجھا کم ݙکھائے ۔ بے جان تھڄوں اُنہائیں دے ناں اِی کھس گھدے نیں ۔ بے جان شہیں ہُنائیں دی سُنڄاݨ تے پچھاݨ بݨین۔

اتوار26؍جنوری1992ء

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان