ولیمہ

کنوار دے گھروں ناشتہ آوݨ دا رواج وی ہوندے ، کتھائیں ناشتے دے بعد کنوار کوں ولیمے دے سنگھار کیتے پارلر گھن ویندن ۔ اِݙوں ولیمے دی تیاری اِچ سارے لڳ ویندن ۔ پُراݨے ویلھے دیگاں خود پکوائیاں ویندیاں ہَن پر ہُݨ تاں آڈر ݙیندن اَتے کھاݨا ،ہال سبھ کجھ تیار مِل ویندن ۔ پہلے زمانے اِچ تاں ولیمے دی روٹی بیادری کوں تول کراہیں ݙتی ویندی ہئی ۔ دیڳڑے بھر بھر لوک گھر چا ویندے ہَن ،ہُݨ ہال اِچ کھائو اَتے جلدی ہال خالی کرو جو ہال آلیں ٻئی شادی دی بکنگ کیتی ہوندی اے ۔ پہلے زمانے اِچ گھریں وچ شادی دا رواج جو ہا قریبی رشتے دار مہینہ مہینہ آ تے ٹک پوندے ہَن جو شادی دا کم کریسوں اَتے شادی دے بعد وی ڈھیر ݙینہ ٹکے رہندے ہَن ۔ پر اَڄ کل بھانویں کولھوں دے سنگ وی ہوندن تاں آہدن چا کھاݨا کھا تے ٻہاہے نہ پئے ہال آلے آہدے کھڑن جو ہال خالی کرو ٻیا ولیمہ یا رخصتی تھیسی ۔ اِتھاں پُراݨے لوک ایہ سوچیندے ہَن جو لوک کیا آکھسِن پر اَڄ دے لوکاں کنوں ایہ کجھ سوچݨ دا ٹیم کائنی ۔ ہر کوئی جلتی اِچ اے۔

پہلے زمانے اِچ ولیمے اُتے کنوار کوں سنگار کرا تے عورتیں اِچ ٻلھیندے ہِن ، پر اَڄ دے زمانے اِچ کھاݨا تاں عورتاں ، جوان اَنج اَنج کھا گھندن پر گھوٹ کنوار کوں عورتاں آلے پاسے سٹیج اُتے کٹھا ٻلہا تے روٹی کھویندن ۔ فوٹو ، مووی بݨیندن ۔ سلامیاں لفافے اِچ پا تے ݙیندن ۔ کنوار دے پیکے ولیمہ کھاوݨ آندن ۔ ڳاوݨ وڄاوݨ ،ویل گھول میوزک ساری رونق ہوندی ہئی ۔ کِھل مذاق ، وی چلدی اے پئی ہک ٻئے نال ۔کجھ جہیں اُتے ولیمہ ݙو پہراں کوں تھیندے (لنچ ٹائم)۔

پر اَڄ کلھ شہراں اِچ کجھ لوک شام دے بعد یا رات کوں (ڈنر) عشائیہ ݙیندن ۔ کیونجو شہراں اِچ رونق شام کوں شروع تھیندی اے ، اَتے رات دیر تئیں لوک جاگ تے رونق لئی راہندن ۔ وَت سویرے چرکے اُٹھدن ۔ شہریں اِچ ناشتہ وی چرکے کرݨ دا رواج اے ۔ پر دیہات اِچ اے رواج ہوندے جو جلتی کم نبیڑ تے سم تھیندن اَتے سویرے وی اذان ویلھے اُٹھی تے نماز قرآن پڑھ تے ناشتہ کیتا اَتے ٹھڈے ٹیم کم نبیڑ گھدے ، پر شہر آلیں دی سویر ݙوپہریں کوں تھیندی اے ۔ جئیں ویلھے تئیں دیہات دے لوک کم نبیڑ گھندن۔

حوالہ

کتاب: رَلے پندھ کریسوں ، مصنّف: زاہدہ اجمل ہاشمی، چھاپہ خانہ : جھوک پرنٹرز‘ ملتان